新城財經台噚日搞咗個雄財宴，亦順道為「香港企業領袖品牌2008」頒獎，除咗財金界名人同分析員濟濟一堂，華華竟然見到玄學界大師楊天命，原來佢都係嘉賓之一，睇嚟佢為港股占卦把脈經已深入民心，華華見場內財金界人士，唔少人埋佢身話係粉絲，就連曹sir曹仁超都要同佢傾兩嘴，兩人仲互相問對方攞股市貼士。曹sir笑笑口話：「今年個市真係睇唔通，冇計，要問吓大師先得。」 曹sir有乜咁睇唔通？咪就係個市囉，佢表情好無奈咁同華華講，今年港股走勢真係睇唔通，一段時間內應該都走唔出二萬二至二萬五點，咁「一段時間」係幾時呢？佢依然係嗰句：「睇唔到。」仲話，次按傷害有幾深？唔知！對歐洲啲銀行影響有幾大？唔知！日本啲銀行有冇受影響？唔知！難怪佢要搵大師啦。
不過楊大師都唔敢喺曹sir面前班門弄斧，佢話因為睇過曹sir啲專欄，知對方對《易經》都有研究，所以大家係惺惺相惜，交流吓咁啫，佢又話上年中為港股占卦，點知遭滑鐵盧，所以今年要講嘅都喺佢本鼠年運程書講晒，年中會封嘴唔再講股喎。