幾個情人一個節日，賭王何鴻燊自然分身乏術。賭王安排與三姨太陳婉珍在澳洲珀斯共度充滿驚喜的情人節，甜蜜撐枱腳又送珍珠，𠱁得三姨太甜蜜非常，難怪四姨太梁安琪呷醋，要自嘲「攬住枕頭跳舞」。
新年一過，各大慈善團體分別舉行新春團拜，祈求來年慈善事業一切順利，昨日東華三院和保良局分別在上環和銅鑼灣舉行團拜。
住家飯換珍珠
賭王何鴻燊三姨太陳婉珍透露早前回港，她說：「之前去咗澳洲珀斯，同老公一齊，都一齊過情人節。」問她收到甚麼情人節禮物？三姨太即指指自己頸上的珍珠鑽石頸鏈說：「佢送咗一套珍珠，呢套就係上年情人節送嘅。我就送咗卡，同埋煮咗餐飯畀佢食，甜品係梳乎里同芝士餅。」
問為何選擇與賭王在澳洲度情人節？三姨太甜笑說：「本來我今次主要去休息，仔女都冇嚟，本來冇預到佢（指賭王）會嚟，唔知點解佢會嚟。啲仔女都係我lover，但唔係我情人。」她指不要求賭王共度元宵佳節，但當天會煮團圓湯丸予賭王吃。賭王對姨太太一向大手筆，問三姨太多年來收過最難忘的禮物？她即說：「一時間諗唔起，同佢一齊30年喇，佢從來冇激嬲我，總係𠱁得我好開心。」
年卅晚已收禮
賭王情人佳節陪了三姨太，四姨太梁安琪昨日出席保良局團拜時說：「我都去咗澳洲避寒，因為香港好凍，我去雪梨同馬來西亞，情人節我返咗澳門，佢未走，我哋隔咗成個洲。」她繼續自嘲說：「何生唔騷我，惟有自己攬住枕頭跳舞。」不過，四姨太透露賭王早早送了禮物，她說：「我年卅晚嗰套珠寶係佢送嘅，我就成個人送咗畀佢啦，老夫老妻，佢都浪漫嘅，我就日日都咁浪漫。」
採訪：JessicaNgan
攝影：RickyChan
