香港幾時有普選？唔通真係要等到我美人遲暮？為沾少少民主氣息，同一班friend下月「北望」，當然唔係北京啦，係台北。3月22日係台灣總統大選，當地選舉出名熱鬧，尤其造勢、祝捷晚會。（當然，都想近距離睇吓小馬哥嘅風采。）
嗰幾日嘅台北機票搶到癲晒，機票都成二、三千蚊，酒店更加爆滿，搞到同事炳哥話唔去。我訂嗰間酒店有個「零舍不同」嘅好處，有免費借手機服務，住客會獲發一部手機，已經set晒快撥號碼，可以用嚟同住唔同房嘅朋友通話，離開酒店都用得，一個去綠營，一個去藍營，可以互通消息，住客之間手機通話係免費㗎！
住客仲可以將手機號碼畀台灣朋友或者香港親友，對方可以打電話畀你，喺台北手機接電話係免費嘅。唯一要收費係，你用部手機打電話畀住客以外嘅地方囉。仲有，酒店大堂有免費上網、飲料㗎，整體設計都幾hip，有興趣可以到呢間「台北商旅」網頁睇睇（ http://www.suitetpe.com）。
逢周一至周四刊出