連日來神秘人「奇拿」已甚少再發放疑似陳冠希與女星的淫照，但事件卻因陳冠希延遲回港交代事情，以致拖延至今尚未平息，昨日仍有不少藝人對此事議論紛紛。
方力申：鼓起勇氣
Edison梗要返嘅，但返嚟都要好大勇氣，可能未ready啩！我哋當然希望佢返嚟。至於Juno（麥浚龍）同阿嬌（鍾欣桐），我向來唔理邊個同邊個拍拖，不過如果係真，我都會祝福佢哋。
蘇永康：性唔淫褻
其實兩個人喺房中做事唔打算公開，咁係咪構成淫褻，性唔係淫褻，大家要正面處理。我有打畀栢芝身邊人，至於拉姑身經百戰，佢有計，佢冇打畀我呻，我就唔敢打電話畀佢。任何人都要堅強面對，如果你覺得自己完蛋就完蛋。大家要記得當事人喺舞台上有好好嘅表現。
許志安：唔煩霆鋒
我冇搵過霆鋒呀，呢啲時候費事煩佢啦，我只係留言畀佢，希望件事快啲了結。（有傳Edison自殺）成日啲嘢得個傳字，我見到老闆都唔會問呢件事，講啲開心嘢好過，總之我唔講啦，老闆都話等當事人返嚟講。
楊千嬅：渲染色情
唔好再講，唔想渲染色情風氣，而且會影響家長、學生，社會有好多人會關注。我不問世事好耐，所以冇同佢（陳冠希）聯絡。你哋聽日去春茗問老闆啦，佢先係指引。我相信佢哋自然有解決方法。
劉心悠：一定sayno
如果陳冠希出嚟，對受害嘅人會好過啲。我以前嘅男朋友冇要求我影呢啲相，如果有咁嘅情況一定要sayno。
鄧健泓：結束事件
要放相上去嘅人會繼續放，唔會因為有人出嚟講幾句就唔放上去，好想件事快啲結束，我唔知有傳佢（陳冠希）迫婚自殺，希望大家會開心啲。
Freeze：要負責任
Edison應該向公眾交代，因為呢啲係一個責任，唔應該只係拍短片就算，如果係親自出嚟交代比較有誠意。