過咗年，雙糧花紅佣金都出晒，呢段應該係打工仔跳槽旺季。醒目仔梗係搵同行裏面最薪優糧準嗰間公司跳槽，就以大陸石油公司嚟講，中石化（386）就入唔過喇，尤其一般打工仔職級，據大陸傳媒引述中石化嘅前線員工話：「中石油和中海油的整體工資水平都要比中石化高一些。」
冇幾耐之前，大陸傳媒報道，中石化將整體平均加薪300蚊，《第一財經日報》嘅記者就去訪問一位喺中石化打工嘅煉化業務前線員工張女士，佢話由98年到08年呢10年入面，佢幾乎冇加過人工，平均月薪得1000蚊人仔。對佢嚟講，300蚊即係加薪三成。
處長級年薪30萬
張女士話，90年代初佢只係得幾百蚊人工，但公司經常派水果食品畀員工，多到食唔晒，另外有交通津貼、牛奶費、季度獎金、高溫費同勞防費。舊年12月試過出4000蚊人工，不過每次加人工就取消一樣津貼，所以今次加薪佢就有啲忐忑不安囉！
前線員工得千零蚊，不過，中石化有位主管級話自己05年有15萬年薪，即係平均皮幾嘢一個月，佢仲話處長級有20萬至30萬蚊人仔，局長級更加唔只呢個數。年年搵咁多，所以高級員工話，加300蚊人工不如出多啲年度獎金好過。
中石化董事會秘書陳革就話，今次加薪重點會特別傾斜去前線同低收入員工。唔知係咪終於聽到前線員工嘅疾苦呢？
賺得多工資自然高
究竟中石化嘅員工福利係咪「跑輸大市」？華華睇番3隻香港上市嘅大陸石油股年報，由於07年度嘅年報仲未出，惟有睇住06年度盤數先。
當中以中石油（857）嘅員工支出最多，06年佢有44.6萬名員工，花喺員工薪酬嘅開支達266.3億銀人仔，較05年增加近37.6%。至於中石化，06年就有34.1萬名員工，薪酬連福利嘅支出都有成167.7億人仔，但就只係比05年增加咗7.8%。人工開支最少嘅係中海油（883），因為佢只有2929名員工，06年人工連福利開支5億人仔，但比05年多37.9%，係3隻石油股中人工支出升幅最多。
不過，中石油同中石化06年純利分別係1422.2億同539.1億銀人仔，中海油就錄得純利309.3億人仔，員工有幾高人工同佢公司賺幾多錢成比例嘅。
電郵：mailto:[email protected]