阿Deep一向都好鍾意李孝利嘅性感形象，不過早排佢演出搞笑節目《星期日真好》，甘願化裝變成180磅肥妹，同扮成中坑嘅SuperJunior（SJ）成員強仁齊齊演出新環節「Change」，仲玩殘一眾嘉賓。
喊晒道歉
兩人拍攝前，用咗超過4個鐘嚟化裝，李孝利要用類似青色嘅石膏物體塗喺面上，整成有雙下巴嘅肥妹；強仁就戴假髮、黐鬚扮中坑。變裝之後，李孝利同強仁就分別扮成電視台編劇同經理人，齊齊整蠱男歌手嘉賓孫浩英同閔慶勳等。
話說坐喺電視台休息室嘅孫浩英，一直等真正嘅李孝利出現，點知等咗兩個鐘都唔見人影，「經理人」強仁於是走入去講對唔住，但佢嘅行為古古怪怪，嚇到眾人唔知點好。
「編劇」李孝利之後現身，低住頭喊晒咁道歉，結果冇人認得出佢哋，孫浩英仲除外套發火想走人。至於佢哋嘅破格演出，令節目前日出街收視急升3.3%，有12.9%收視率，仲有唔少網友喺節目網頁度讚佢哋演技好㖭。
版主：網盜王尊尼Deep
本欄逢周一至五刊出
網址： http://tvpot.daum.net/clip/ClipView.do?clipid=6694471