Blogpaper：決志蘋果教

近年越來越多人成為Mac友，但用的是Windows。你認為多此一舉？但他們花得起！
一旦加入蘋果教的行列，你對電腦外形完美的追求就會永不回頭。膚淺？人就係咁膚淺！
無窮無盡推向完美的慾望，會令你想MacBook變成心儀的顏色。虛榮？只係你對它魔力的認同啫！

攝影：楊錦文、黃子偉

http://appleblogpaper.blogspot.com

aboutme:空姐

職業：使錢。唔靚唔愛，唔型唔要。細個見工最大的恐懼係填長處一欄，因為冇。人大了才發覺自己長處係夠八，甚麼東西都可以問一餐。越問得多，越知得多，使錢就越多。

Mac如中毒

新年流流，特別有興致同一些好久不見的朋友打吓牙骱，八吓近況。近日見到趙式芝Gigi，身上突然多了很多純白色的衣服鞋襪，感覺清新。細問之下，原來中了毒，而此毒乃蘋果毒，病毒源頭來自一部純白色MacBook。對於Mac機，從未接觸的普羅大眾會聽而抗之：「我用開PC，唔得㗎！」

其實Gigi亦不例外，佢話受感染的起因係被同事傳染，眼見公司有個同事用一部iPhone、一部MacBook，兩者之間的天衣無縫，就咁開始產生興趣。就由「睇吓先」開始，漸漸逃不掉其魔掌。

中環一族都花不起重新學習的時間，所以她仍然裝番Windows，而非蘋果原有OS。其實不少電腦友都講話，用Mac行Windows，隨時行得比PC更順，正宗Mac迷梗係話OS先係蘋果元神所在啦，哈，咁我哋新玩Mac，都係求有型而不失易用，MacBook能行視窗，$8,000多的投資，的確又抵又安心喎。以我觀察，搭一程飛機坐BusinessClass、走入PacificCoffee買杯咖啡，都隨處可見「Mac友」用Windows，臉上充滿沾沾自喜的表情。虛榮？當你入咗「蘋果教」，自不然因為無懈可擊的靚仔外形而產生優越感。

■Gigi最近齊齊加入Mac友的行列，開始有迷戀白色的傾向。

■白色魔力令你身邊所有都希望以白色配合。如Mouse及機套。

紅Mac要訂做

玩得Mac，必承認其魔力是在於完美無瑕的外表，尤其係白色MacBook。有個傳聞：話說曾經有個設計師設計一件新產品，心滿意足的攞去畀教主SteveJobs睇，但就係因為一粒礙眼螺絲而被完美教主請食無情雞！此傳說本小姐證實唔到真偽，不過可見蘋果對外形的追求深入民心。

講得外形，又點少得提提近日「紅人」愛廸生部「限量版」粉紅色MacBook啦。單新聞一出，好多潮人湧去問Apple部機邊度有得賣，其實呢部邊係限量版啫，而係美國著名改裝公司Colorware出品，此公司只負責幫你將個人電腦（iPod、iPhone都幫你改嘅）重新噴漆，換句說話，即係玩Customize，好似訂做時裝咁囉。用得Mac自然要威要靚仔，幫襯Colorware可謂威到盡。喺香港要幫襯，要你自己寄部機過去美國㗎，費用要$3,000以上，一來一回仲要等個幾月。（ http://www.colorwarepc.com）

■將部MacBook變色，虛榮感覺會更強，因為幾千蚊搞一搞，真係唔係人人花得起。

如此追求那份虛榮是否很天真很儍？咁就等於問「見靚仔就嗒糖是否很膚淺？」我曾問過Mac專家朋友祥仔：「點解咁多人愛Mac呀？」佢二話不說答我：「因為個蘋果Logo識發光囉！」我大叫：「有冇咁膚淺呀！」他有證有據肯定地答：「一套《SexandTheCity》，鏡頭影住女主角開機，蘋果Logo發光的畫面，足以吸引過百人落店問係咪有電腦識發光。」無錯！人就係咁膚淺的動物！

■《色慾都市》內，Carrie成日示範用MacBook打稿。

Mac機仍有三大弱點

講咗咁多好處，真係要換Mac的朋友，又提吓你哋Mac的「壞處」。

早年全世界美術友都必定用Mac，因為蘋果做GraphicDesign公認特別強，不過近年PC的美術軟件亦越來越勁喎。以前大家都話Mac機無病毒，咁仲要提大家多一句：假使你用佢來行Windows，一樣有病毒！OK，你真係連蘋果個元神（OS）都要埋，諗住學過喇，咁剩低要考慮的，主要就係適應力的問題。此外，仲有所謂「蘋果三大缺點」，包括：一）瀏覽香港政府網頁及eServices服務，政府未有配套supportMac；二）室內設計軟件Autocad未有中文版；三）係大部份電腦遊戲都未能支援Mac。

這三個「缺點」，對於好多人來講都係閒事。好多人，包括本小姐，話說就這篇文章，就係喺一部珍珠白MacBook打出的。

■想改善政府網頁不支援Mac機的問題，可以用VMWARE軟件解決。$640