iPhone係蘋果公司嘅王牌，蘋果推出呢部手機時，聯同網絡商推出綑綁式服務，諗住賣機之餘，仲可以瓜分月費收益，不過，iPhone開售兩個月就極速被解鎖，買咗呢啲解咗鎖iPhone嘅消費者，可以唔使幫襯指定嘅網絡商。至於呢啲解咗鎖嘅iPhone流咗去邊？用緊乜嘢網絡商？
據美國研究公司In-Stat引述中移動嘅數據，蘋果公司舊年共賣出咗370萬部iPhone，其中10%以上iPhone流入咗中國，心水清都會發現，亞洲仲未有行貨iPhone，咁流入去大陸嘅好自然係水貨，而且呢啲仲唔係一般水貨，據報道話，全球𠵱家共有約100萬部解鎖版iPhone，其中就有40萬部入咗中國，用緊中移動嘅網絡，，佔全球解鎖版總量近40%。即係話，中移動一早飲咗蘋果嘅頭啖湯！
本來iPhone會生金蛋，打入龐大嘅中國巿場，利潤一定相當和味，但水貨一早已經入晒中國，就算中國有行貨iPhone，巿場仲會唔會咁「熱切期待」呢？蘋果靠綑綁協議分紅呢個如意算盤打唔打得響？