一個哭泣的禱告，改變了杜麗莎女兒T.V.Carpio的命運。現年26歲的她，某日在洛杉磯一邊駕車，一邊向上天哭求，希望找到一份新工，之後，她不單在獲得金球獎最佳音樂/喜劇電影提名的《戀愛心曲》中粉墨登場，大唱披頭四（TheBeatles）名曲，並帶挈父親有緣與搖滾巨星Bono一起客串，她還獲得Bono賞識，下一站將會在萬眾期待的《蜘蛛俠》（Spider-Man）舞台劇中合作演出。 採訪、攝影：張一明
杜麗莎與前夫所生的女兒T.V.Carpio（T.V.），日前訪港宣傳本月28日上映的美國音樂片《戀愛心曲》（AcrosstheUniverse），並接受本報專訪。《戀》片由披頭四名曲串連而成，並獲金球獎最佳音樂/喜劇電影提名，大受矚目，也令原本寂寂無聞的T.V.漸受影迷認識，在美國編劇罷工完畢後，她將與荷李活不同的電影公司密斟合作大計。
齊綵排似去Camp
T.V.在訪問時坦白地說：「接拍呢套片之前，我剛剛由紐約搬到羅省，嗰陣我最想快啲搵到工，有一日我揸緊車嗰陣喺度喊，祈求上天快啲幫我搵份工，點知我後來搵到經理人，仲參加套片嘅面試。之後經理人打畀我，佢話個角色已經俾人攞咗……嗰個人叫T.V.Carpio！我開心得即刻打畀爹哋同媽咪！」
不靠母蔭入行的T.V.，承認自己不是大明星，但接拍了《戀》片令她感到很幸福，十足做了一場好夢，她說：「開拍之前，我哋同其他演員花咗八個月綵排，一齊去唱Beatles嘅歌，大家好似去camp咁，好開心。片中有份客串嘅Bono仲嚟睇我哋綵排，佢睇完我唱歌之後，同我講『T.V.,Iknowyoucansing！Iwanttohelpyouout！』我覺得好開心，Bono完全冇架子。」
《蜘》舞台劇創歷史
T.V.更帶挈了爸爸跟天王巨星Bono客串演出，一同扮演60年代嬉皮士，她說：「爸爸知道我接拍套片嗰陣已經好興奮，佢話『T.V.你唔使睇書或影帶，因為爸爸對嗰個年代好清楚。』後來導演邀請爸爸客串，我好妒忌佢可以同Bono一齊做戲。雖然今次我同Bono冇對手戲，但我會再同呢套片嘅導演、Bono同埋佢嘅U2樂隊結他手Edge，一齊喺《Spider-Man》嘅音樂劇合作，個劇明年公演，一定會改寫百老匯舞台劇嘅歷史！」
演女同志找真愛
原來T.V.自小已是溜冰好手，在片中更一展所長，但她坦言拍攝時有不少蝦碌：「我一向玩開Rollerblade（直排輪溜冰鞋），喺綵排嗰陣冇問題，但拍攝嗰陣要着四輪滾軸溜冰鞋，仲要掛隻馬喺身，一開拍我就失控撞爛成個道具！」對T.V.而言，最辛苦的一場戲是在海灘全裸跳舞，她說：「導演一早問我全裸演出有沒有問題，我覺得那場戲不算全裸，因為有bodypainting，最辛苦係嗰日朝早4點已去海灘拍，真係好凍，不過又好似跳日本傳統舞，好靚！」
已有男友的T.V.在片中的角色是一名女同志，但她對角色有另一種體會：「雖然美國記者話我個角色係lesbian，但我覺得嗰個年代嘅人比較純真，佢只係去找尋自己嘅愛。」
話你知：莎瑪畀面客串
美國女導演茱莉泰摩（JulieTaymor）刻意找來一班影壇新星擔正演出《戀愛心曲》，以增加電影的新鮮感及故事的說服力，不過，她仍邀請了不少歌影知名藝人客串演出，除了愛爾蘭搖滾班霸U2主音Bono外，曾在茱莉泰摩執導的舊作《筆姬別戀》（Frida）中擔正演出的莎瑪希恩（SalmaHayek圖），也客串扮演性感女護士，並大開金口獻唱披頭四名曲。英國老牌R&B歌手JoeCocker也客串，並一人分飾三角。
劇情介紹：披頭四影子貫穿電影
《戀愛心曲》是一齣由披頭四（TheBeatles）音樂所啓發的音樂劇，故事發生在60年代，劇情講述來自英國名叫Jude的碼頭工人，獨自到美國找尋親生父親，並於當地與Lucy邂逅。Lucy的長兄當時要參與越戰，故Jude於尋找親生父的同時，更與Lucy齊齊參與反戰活動。片中所有角色的名字均由披頭四歌曲所啓發，當中更有30首披頭四歌曲出現。
