喺內地發生嘅大雪災，同埋成千上萬民工迫爆火車站嘅場面，對經濟學家謝國忠嚟講，有另一番領悟，佢認為：「中國經濟發展成功嘅一日，就係呢班民工可以喺工作嘅城市，同屋企人一齊過年，唔使再趕火車迫返鄉下過節。」
地方政府咪收土地費
佢剛啱發表文章話，工資低廉嘅民工，係推動中國近30年經濟發展嘅基礎，但到𠵱家佢哋仍然被稱為民工，未能喺工作嘅城市扎根，係好唔正常。喺其他國家工業化同城市化過程中，外來勞工通常都可以迅速喺城市扎根。又係噃，外勞變自己人，咁咪唔使年年迫火車囉？
中國追唔上呢種發展步伐，佢話原因係內地城市樓房價錢高企，再加埋戶口體制問題。佢建議大規模發展廉租房，主要提供畀呢班民工，具體方法係：地方政府唔收土地費，將廉租房開發成本，控制喺每平方米2000蚊人民幣，以5%租金收益率計算，租金可以低至每月每平方米8蚊人民幣，相信呢個水平嘅租金，一般民工都有能力應付，甚至可以將老家大小接嚟城市一齊住。
至於戶籍問題，佢建議當地政府，喺城市打工10年嘅民工，可以承認佢哋一般城市居民嘅資格。