Freeze前晚在旺角街頭跳舞演繹新歌，吸引逾百市民圍觀，其中大部份是男性，三嬌以低胸裝上陣，為免被博懵睇蝕，她們又貼乳貼又黐膠紙，做足安全措施。陳樂榣表示她的防狼術是踢色狼下體或偷襲反擊。
三人女子組合Freeze為宣傳新歌《踩鋼綫》不遺餘力，前晚在旺角鬧市行人專用區載歌載舞，兼且大派利是給途人，不過利是內是一張三嬌的相片，及500元「變靚D」贈券，雖然並非現金，但同樣受歡迎被勁搶。
圍觀男士紛紛出動相機手機影相，Freeze亦來者不拒任影唔嬲，大擺甫士的她們不時俯身露酥胸，所以本來下着毛毛細雨，但憑她們的熱情都留得住眾男士，而她們正式勁歌熱舞時更天公造美停雨。
試過又搶又攬
Freeze的石詠莉說：「我都唔係第一次嚟旺角做嘢，以前試過場面混亂，俾人又搶又攬，所以今次小心啲，其實我都怕俾人胸襲同怕混亂，我唔會畀人行得太近，不過我有貼乳貼上陣。」陳樂榣則表示自己不用貼乳貼，她又表示自創防狼術，並笑說：「我會踢佢下面，或者偷襲番佢。」
採訪、攝影：王連連