英皇金融同英皇證券（717）噚日一齊搞聯歡晚會，往年佢哋會請英皇旗下歌手表演，今年因為搵咗Twins嚟獻唱，所以除咗財經記者，仲有唔少娛記出現，於是英皇就採取雙重標準，安排唔同嘅記者喺唔同位置採訪。
聯歡會喺會展會議廳舉行，英皇就喺會議廳樓下先攔截娛記，財記先准放行，但都只到會議廳門外。聯歡晚會開始後，老闆楊受成先拖住太太陸小曼到場，佢笑笑口同食閉門羮嘅記者講完「恭喜發財」就急急腳入場。
楊生雖然喺門外只係留低「恭喜發財」4個字，但據聞佢對住一班員工就預備一大篇講稿，話英皇證券自舊年4月上市，到上年最後一個交易日收報1.39銀，比招股價0.38銀升咗2.6倍，表現好好。
雖然華華冇份參加聯歡會，但八到節目同菜式都好豐富，包括醒獅及國粹之一嘅變臉表演，歌星除咗Twins之外，鍾舒漫同林峯都嚟助興；而菜式中，一道「碧綠炒雙鳳片」似有襯托Twins之意，海皇生翅同焗響螺都唔失禮，不過舊年股市暢旺，華華以為一人有一隻鮑魚，點知只係得「花菇鮮鮑片」。
