上個禮拜，消委會公佈，有兩間銀行唔再為新客戶提供傳統嘅「紅簿仔」戶口。銀行話此舉係邁向無紙化，但敏妮相信，呢招係變相焗啲客開綜合理財戶口嘅第一步，因為，即使唔畀紅簿仔啲客，每個月銀行存戶都會收到月結單，加上經常收到銀行推廣信，試問又點會無紙化！
銀行寧做貴客生意
敏妮唔敢話銀行想迫走啲冇咁「優質」嘅客戶，但好明顯係想保留更多資源做「優質客」生意。如果香港商界真係向住呢個趨勢發展，市民除咗要發憤做個有錢人，亦都要為日後生活盤算。其實，敏妮都認識一啲朋友，諗住退休之後去啲生活指數冇咁高嘅地方定居，以前就話好多人移民加拿大、澳洲，今時唔同往日，全球都望住中國，所以退休返大陸安享晚年，不失為好建議。問題係，港紙貶值，相反人民幣就升值，香港人真係要返大陸退休，最好都係早啲起步投資人民幣資產，開人仔存款戶口之外，大陸物業都係一個好投資。
逆按揭越長命越抵
當然近排不斷有人話，雪災會令中央放緩宏調速度，但即使有宏調，影響都係短線。周末敏妮喺《人民日報》睇到篇文章，引述全國政協委員賴明提出「以房養老」嘅議題。
其實早喺06年，大陸已經提出過關於推行「以房養老」嘅建議，所謂以房養老，喺香港都有人提出過，即係所謂嘅「逆按揭」，年輕時供樓，到老來時由層樓「供養」番你，將層已供滿嘅樓，按畀銀行，喺釐定樓價、息率後，銀行每月畀番一定金額按揭人，咁就可以當為生活費，直至按揭人百年歸老，層樓就歸銀行，當然，按揭人越長命就越抵。
類似嘅「逆按揭」喺歐美已經實行一段時間，家陣大陸有政協委員再提出，相信日後成事機會好高，若果真係成事，咁𠵱家趁大陸樓市調整買定層樓博升值又好，用嚟日後退休自住都有個保障。
http://wanmanli.com/blogs/