豬年年三十晚（二月六日）凌晨，美國證交會（SEC）宣佈就杜瓊斯內幕交易案與李國寶、梁啓雄等人達成和解協議，李國寶與其他人士各繳款8,121,335美元，因其他人冇乜新聞價值，本地報紙比較少提，將注意力放在李國寶身上。李國寶被指控洩漏梅鐸新聞集團意圖收購杜瓊斯，令被指控得到消息嘅梁啓雄、梁女、梁女婿買入杜瓊斯股票，賺咗八百餘萬美元。
呢件事並非新新聞，舊年已經報道過。但耐人尋味嘅，有人趁住和解消息公佈，想話乘機砌低一個好人、老實人，逼李國寶辭去公職，呢啲人嘅藉口係李國寶「口疏」，誠信有問題，不知者以為好嚴重，知道一啲情況嘅賓架，就不禁搖頭嘆息，香港傳媒界，政界內有人真係天真唔識，有人作狀扮唔識，懷有公報私仇目的，實在嚇怕人。卒之，李國寶為咗曾特首，自願犧牲小我，辭去行政會議職位，可敬也！
別人唔識猶可說，詹培忠議員與湯家驊議員對法律與打官司之認識，深厚到極，佢哋點可以講李國寶與美國證交會達成和解協議，等於默認呢？逢係對美國司法習慣有常識嘅人都知道，美國官方鍾意舉起大棒子嚇人，目的唔係要拉人坐監懲戒之，而係要大量賠款兼唔使上庭花時間，現在紐約州州長史必茲（Spitzer）就係靠呢招，利用若干疑點，強力逼迫花旗、AIG等大集團賠十幾億美元，叫做庭外和解。有一位小人物係美國銀行附屬公司嘅經紀，因為冇錢賠，係要上法庭，後來贏咗官司㖭。但大集團與有錢人（不論係AIG嘅Greenberg還是李國寶，或花旗集團）會考慮及：（一）打官司隨時要七至八年時間，誰勝誰負難以預料，可以一路打到去美國最高法院，律師費用一定超過一億港元，（二）打官司期間，大財團與有錢人不勝其擾，花費大量冇生產力嘅時間，（三）李國寶已經六十九歲（屬兔，與夏佳理等兔仔今年刑太歲，可能有口舌之爭與官非），如果成日要去美國上庭，時間與精神皆難應付。坦白講，如果有人請湯大狀做法律顧問嘅話，湯大狀會叫佢哋上美國法庭力爭到底打八年官司吖，還是和解賠款了事呢？