花旗股市再現次按恐慌，聯儲局主席伯南克話風暴未過，格林斯潘又話花旗經濟喺衰退邊緣，瑞銀又估計銀行業要為次按再撇賬多2000億美元，聽見都心寒。
花旗股市繼續偏軟，雖然幅走勢圖唔算太差，不過咁係講緊一兩日嘅變化，大形勢嚟講都係反覆向下嘅格局。
香港嘅銀行股𠵱家震騰騰，東亞（023）大幅撥備，下個月3號輪到滙控（005）公佈業績，任總已經打開口牌，睇怕滙控都好難再唧牙膏咁撥備，如果遲啲滙控有低位撈貨嘅機會，咁𠵱家114.8元股價就肯定係貴。
中電信C輪3690：中電信（728）上周五收6.2元，連續3日有成交支持股價上升，破埋條50日線，下個位睇上次高位7.14元，可以諗吓隻C輪3690，隻輪上周五收1.05元，槓桿5.9倍（有效3.5倍），正股升上7.14元，3690可見1.68元，正股跌穿5.8元止蝕。