泛海（129）03年沙士期最低位0.204元，現價仲殘過沙氏價，勁抵買。泛海今年頭宣佈2供1，每股供股價0.18元。一供股，泛海由年頭插咗34%，現價0.183元，比起沙士期最低位，仲要跌多10%。又以供股攤薄效應計，連泛海重秤前NAV0.55元，現價折讓，都去到近67%，連重秤後NAV折讓，上到去70%。除非相信未來資產價格係超級大縮水，兼且要差過03年，否則，泛海NAV應該唔點走樣，而呢個折讓水位，係誇張得離譜。
再講，泛海1月宣佈供股，咁啱遇正港股大插插，2月4號除權前幾日，泛海甚至有低過供股價場面。又要考慮吓小股東會唔會瞓晒覺唔供，包銷商又使唔使上晒身。話晒泛海現價，都係高出供股價3個仙，現水位非常安全。買泛海，起碼要睇翻半番到0.275元。到時，泛海NAV折讓仲係講緊50%，目標價絕對合情全理。
錦興抵買放長線
錦興（275）最新NAV接近0.8元，現價0.201元折讓高達75%，亦係另一隻折讓誇張得非常離譜嘅股仔。要咁睇，錦興單係07年上半年度純利，已經上到近6億銀，就算全年度純利都係keep係呢個水位，PE都係得一兩倍，業績已經無問題。再講，錦興係殼王旗下企業嘅第二梯隊，除非安於現狀，否則錦興遲早有機會被湊大。呢轉預蝕買錦興，擺埋一邊放長線，博翻一番到0.4元，折讓都仲有50%水位。