警察學院噚日舉行畢業步操禮，有200幾個新紮警員畢業。近日警方因為淫照風暴同雷射槍事件俾人狂抦，形象大損，呢班畢業學警既然已經入行，惟有盡力做好呢份工。成績最好、獲頒榮譽警棍畢業嘅督察伍家康，大學畢業後曾經做過銀行結算員，做咗一排覺得好悶，覺得做督察更有前途，加上警隊形象正面就決定轉行。
讚教官有愛心
另外兩位優秀畢業嘅警員洪焯銳同姚倩珩雙雙獲頒銀笛嘉勉，洪焯銳更拎埋代表最優秀畢業警員嘅薛富盃。呢兩位新紮師弟、師妹原來以前都係做銀行工，都係覺得返銀行好悶，所以把心一橫轉工。洪焯銳話警校教官好有愛心，唔係鐵面警官，有次佢哋一班學警操咗成日全身散晒，阿sir竟然拎咗幾十碗由自己太太親手煮嘅糖水畀佢哋，成班人感動到喊咁滯。
近日警隊俾人鬧到暈，「警字兩個口」形象開始深入民心，呢幾位警隊新丁異口同聲話唔擔心警隊嘅形象會受淫照風暴影響，又話警隊一直都與時並進面對新挑戰。八方聽佢哋咁講，好似之前有台詞背咁，警校啲教官果然教導有方。