自從中文大學教育學院教授曾榮光嘅研究曝光後，中學界吹起一陣「反動風」，「翻案風」，要求中學自定教學語言。五個議會代表，即補助學校議會，英文中學聯會，中文中學聯會，津貼中學議會，直接資助學校議會，與家校會呢六個主要教育團體一致反對英中與中中之分。董特首與羅范椒芬既然已經退休，曾蔭權與孫明揚兩位「老政務官」在教育政策方面話晒事，對母語教學唔會揸得好緊，既然香港教育界一致要求，香港回復舊制（即除少數精英學校外，其他學校都係學生用英文課本，老師用中文教），只係時間問題，最緊要嘅係，大家只做不說，不要過份渲染，令教育局難堪。
曾教授嘅研究指出，中中學生入本地大學嘅機會唔夠英中好，引申之下，中中生去外國留學嘅機率更低於英中生。既然如此，家長送子女入大學之途，由中一開始，只要小六升中一選學校時，入到英中，咁就入大學之途較為平坦。唔怪得電子傳媒老總Y最近蓮子蓉咁面口，因為佢位么子已知就快可以成為吳天海袁天凡等名人嘅師弟，心情大靚，成個人定晒，不枉佢辛辛苦苦從新界搬出九龍旺區也。
記得好多年前左丁山碰到一位日本著名貴族私立大學慶應嘅大教授，好天真咁問佢：「日本中學生入慶應大學，有無難度？」大教授答：「先入慶應中學。」問：「點入慶應中學？」答：「先入慶應小學。」問：「點入慶小？」答：「先入慶應幼稚園。」問：「點入慶幼？」答「先入慶應幼兒院。」唉，講到底，阿媽一大肚就要去慶應註冊報名，競爭可用「殘酷」嚟形容。唔怪得日本人見到慶應大學學生，零舍特別好禮貌。香港冇慶應，但有英中中中之分，如果係咁，日後啲父母，望子成龍，你估會點？第一件事就係為子部署，一定要入英中。如何入英中？一定要入著名小學。如何入著名小學？一定要入著名幼稚園，如何入著名幼稚園，點入法，左丁山唔識，無此經驗，唔該啲「新鮮父母」為子女操心十二年先，再唔係嘅話，齊齊加入家長教師會，操兵去禮賓府請願，反對僵硬的母語教學政策。