香港青年發展網絡噚日舉行好人好事頒獎禮，「候選好人」包括勞工及福利局局長張建宗，連特區政府都獲提名。張建宗嘅提名人叫「阿飛」，提名原因係張建宗舊年12月尾出席一個天水圍居民真情對話晚會，承諾政府會喺天水圍搞就業培訓中心，至於特區政府亦係同樣話會加強支持天水圍社區服務而獲提名，提名原因擦鞋味道濃烈。
香港人眼睛係雪亮嘅，高官收納稅人錢出糧，應份做好呢份工，唔算係好人好事，所以雙雙落選。老實講，大家幾何見高官做好人、政府做好事先！如果高官同政府攞獎，八方認為應該掉轉頭頒個「好人好事」獎畀主辦機構。呢個機構同民建聯關係密切，總幹事鍾明彰做過民建聯職員。