東亞（023）主席李國寶上個禮拜尾相當唔得閒，首先股壇長毛DavidWebb發起網上民調要拉佢落台，跟手星期五寶哥哥又要披甲上陣公佈東亞銀行業績，咁仲唔止，周末仲兩度向曾特首請辭，星期日晨早又要坐飛機出trip。
不過，幾忙都好，寶哥哥仲係掛住班幫佢賺錢嘅下屬，東亞業績都算喺證券界預測嘅範圍之內，華華聽聞，佢哋銀行已經向高層員工發咗花紅通知，據講金額比舊年為佳，不過具體幅度就保密嘞。由於東亞一般員工仲係享受緊雙糧制度，故只有百幾二百個銀行高層會受惠於上述花紅獎勵計劃。
至於全體員工嘅薪酬調整幅度，就要留到4月先有通知並且生效。截至去年底，東亞香港員工就有5162人，其他大中華地區亦聘請咗3417人。