女人機變地圖王<br>Pearl旅行唔靠男人

女人機變地圖王
Pearl旅行唔靠男人

黑莓（BlackBerry）好聰明，好耐之前已為旗下電郵手機開設一條「後路」！Pearl──被視為掌上明珠，女人至愛；憑其銀色邊鏡面設計，加上的骰輕盈機身，的確好容易就會引來狂蜂浪蝶！但今次8110有啲唔同，靚樣固然重要，機內更首次安裝GPS（全球定位系統）功能，第時女人去旅遊、行山、Shopping，自己顧自己就得，仲使乜靠男人！

記者：陳國輝
攝影：林栢鈞
Model：Cody

兩款地圖任你「碌」

其實，另一系列BlackBerryCurve早已推出GPS功能，但身為女性用家，又有幾多人接受到體積龐大嘅QWERTY手機？今次Pearl8110以GPS作賣點，相信目的係為迎合一班鍾意揹背囊嘅年輕OL而推出。手機支援《BlackBerryMap》及《GoogleMap》兩套軟件，前者唔單止有駕車人士專用嘅汽車路線，仲為一般用家提供步行路線，加埋全程語音提示，到外國旅行啱晒！雖然，操控上冇剛發佈嘅Nokia手機具備ShortcutKey，但靠一粒圓形Pearl鍵碌來碌去瀏覽地圖，同樣好Easy！

■手攜一部GPS手機，即使身邊冇男人，一樣玩通全世界！

■同時設有兩款地圖，方便自設旅行路線。

■《GoogleMap》有中文地名，用落有親切感！

玩Facebook打字快

近期最Hit娛樂，除咗上網寫Blog以文會友，梗唔少得上《Facebook》啦！如果你懶得用雙手打英文字，可利用8110提供嘅SureType鍵盤，用一隻手指公嚟輸入英文字。老實講，速度肯定冇QWERTY鍵盤咁直接咁快，但勝在SureType有效將鍵盤面積慳最少一倍，令體積大縮水，方便OL放落手袋，拎出嚟用亦美觀啲！另外，呢種SureType鍵盤仲可運用到GoogleTalk及Yahoo!Messenger兩款聊天工具，現時具備呢種功能嘅手機牌子，仍是寥寥可數只得三、四隻。