恒指服務公司上周五作出的定期檢討，藍籌維持不變，H指卻頗出乎意料地出三入二，加入兩隻新貴分別為中鐵（390）及中國建材（3323），中外運（598）、魏橋紡織（2698）與近日逼近新高價位的中興通訊（763）則被飛出局，成份股將由43隻減至42隻。
可步中鐵後塵入H指
計一計市值，是次變動其實相當合理，中外運H股市值只得47.9億元，魏橋得46.1億，而中興雖然差點創新高，市值都只得77.1億元，3隻加埋只得171億，不及一隻中國建材的214億元市值。
中鐵市值更大，有408億，佔日後H指比重1.48%，由於被飛股份市值小，新加兩隻新貴市值大，短線重磅股如中石油（857）或構成短線指數基金沽盤。中鐵市值已大過電盈（008）的300億元，成交更加無得比，兼股份已全流通，日後晉身藍籌無得走雞。
至於市值約100億元，背景雄厚的半新H股中材（1893），雖然市值不及中國建材，惟其日均成交卻明顯高於中國建材，因此中材日後入H指機會相當高。中鐵今日若高開才追可能較蝕章，若中材低開，有低吸之道。
另外紅籌指數成份股也有變，金威啤酒（124）與華晨（1114）將被踢走，換入5隻半新股比亞廸電子（285）、中外航運（368）、方興地產（817）、遠洋地產（3377）與重汽（3808）。以上5隻新貴，中外航運及重汽可說係散戶重災區，上市潛水不特止，仲要越潛越深，層層蟹貨，故若有意短炒新貴，此兩股絕非對象。
紅籌新貴揀遠洋地產
若比較方興地產與遠洋地產，前者上市即遇上817大跌市，惟若當日夠膽2元左右買貨，最高升至6.50元都幾和味，近月調整後仍有近4元，算係硬淨。至於遠洋地產，由於招股熱爆，首日掛牌即大升4成至10.80元，其後最高升至15.60元，經近期調整，現價較招股價7.70元高出唔多，睇落呢隻最有短炒機會。