上星期六本欄講到電腦J面對瘋狂加租，十分無奈，可能要離開佢已經租用近十年嘅中環雲咸街寫字樓，或者要搬去鰂魚涌工業大廈。此乃無可奈何之事，有能力交租者方可留在中環，如果自己間公司對顧客嘅議價能力不高嘅話，唯有與中環拜拜可也。
咁啱同一時間，老友W打電話嚟報喜，佢話去年第四季佢開始未雨綢繆，為退休做準備，喺雲咸街附近買咗一個幾百呎嘅寫字樓，作將來退休後，出入中環之用。當時左丁山笑佢：「人哋退休就遠離中環，只會久唔久到中環飲吓茶就算，邊有好似你咁，要買個細寫字樓㗎？」老友W話：「且慢，我畢業後就在中環工作，至今三十餘年，退休後日日返中環上班做自己嘢，睇報紙，在中環食飯，我相信可以保持身心健康，避免老人癡呆症。趁現在有啲錢，買咗寫字樓先，好過以後交貴租，畀唔起。你退休後，我租張寫字枱畀你。」言猶在耳，老友W報喜話佢間新買入嘅寫字樓已經增值15%，地產經紀以為佢係炒家，叫佢出貨㖭，但佢堅決不賣。
真係有錢就有錢，老友W不費吹灰之力就賬面賺咗幾十萬。然後，到鬼佬R呻笨，佢早前賣咗山頂間四十年樓，以為趁高出貨，點知最近聽加列山道啲鬼佬老友講，一個財團，與兩棟大廈嘅四十八位業主達成收購協議，不論單位高層低層，不論山景海景，一口價，每個單位以八千萬元收樓，以每單位約二千二百平方呎計，呎價高達三萬六千幾蚊。
鬼佬R聽到，幾乎暈低，因為佢知道自己住嘅大廈之中，該財團已買咗成十個單位也，可能遲早出高價向其他業主收購。財團以咁高價錢收購山頂舊屋，聽講係作長期投資，收租之用，就算重新拆建，都會只租不賣。該財團在其他地區嘅住宅，就只售不租。
地產咁好景，銀行未必認同，過往習慣係財團買咗地，可以向銀行借地價五成及建築費十成，賣樓後全部清還。但最近銀行界老友話，一幅南區地皮高價拍賣後，新業主用內部資金清付地價，向銀行申請再融資，至今未有結果，點解會咁？因為銀行揸緊一啲喎！