俗語有云「矮仔多計」，天生五短身材的曾志偉，完全是人辦。沒有俊俏臉孔的他，沒怨天也沒尤人，在台前幕後苦幹34年，默默耕耘，成功殺出另一條血路，成為觀眾心目中的笑匠。
志偉的腦袋有掏之不盡的創意，發放的笑彈，炸爆觀眾的嘴巴。龍虎武師出身的他，在水銀燈下當過演員、導演，甚至監製等不同崗位，均相當稱職。未來志偉承諾繼續做到老學到老，促使他立下永不言休的動力，卻是希望為影壇打起一股又一股的新浪花。 撰文：比華利
現年54歲的曾志偉從事影藝工作34年，自龍虎武師出身，之後再擔任演員、導演和監製等不同崗位，對演藝界貢獻良多，故此下月舉行的第32屆香港國際電影節就邀請他成為「焦點影人」，大會除了會放映志偉8部代表作外，由他監製的新片《九降風》屆時也會舉行首映禮，《九》片由中港台不同導演執導，但就選用同一題材，希望帶出不同地域各自的特色和風格。
難忘黑幫角色
問演而優則導兼監製的志偉，最喜歡水銀燈下那個工作崗位？他說：「每個位置都畀到我好大滿足感，做導演最花時間，因為同時要處理好多細節，監製嘅位置就好考眼光，但可以透過一部電影去栽培新人。」
志偉曾參與的電影逾百部，不過他直認並非全是得意之作，更不諱言當中有不少爛片，印象已模糊不清，至於《雙城故事》和《甜蜜蜜》應該最值得驕傲，皆因他分別憑《雙》片於92年奪香港電影金像獎最佳男主角，以及憑《甜》片於97年榮膺香港電影金像獎最佳男配角，志偉說：「我最鍾意演繹小人物角色，好似《甜蜜蜜》嘅黑社會大佬，同張曼玉有一段情，重點係劇情交代一個靚女有情有義，真心愛上黑社會大佬。」當時接演黑幫大佬角色，一度令志偉非常頭痕，究竟怎樣演繹才能維肖維妙？他說：「我忽然靈機一觸，身邊真係有一個咁嘅朋友，佢其貌不揚，但有情有義，又有幽默感，好得女人歡心，我就將佢嘅性格copy上身。」
窮一生育人才
志偉見現今香港影壇停滯不前，故決定永不言休，目標是窮一生精力培育電影接班人，他說：「香港影壇最大缺點係缺乏新一代嘅電影工作者，偏偏觀眾就永遠係年輕一輩，所以我好鼓勵資深嘅電影人拍多啲青春片，盡量畀機會新人。」
提到起用新人，志偉最欣賞李安在電影《色，戒》中大膽起用湯唯，來配搭超級大牌梁朝偉，志偉說：「其實拍一套大片絕對花得起時間，只要有粒大牌擔正，導演又肯教吓新人，咁樣影壇會有好多生力軍。好似電影《投名狀》咁，部戲卡士好勁，有李連杰同劉德華擔正，根本金城武個位可以換個新人入去，咁樣影圈或者會多粒新星。」
「冇人爭飯碗」
身形和樣貌對演員來說相當重要，問經常被揶揄又肥又矮的志偉若能夠改變現實，他會首選增高嗎？他搖了搖頭說：「後生嘅時候，我從來冇諗過做演員，印象中演員都係靚仔到好似周潤發，點會有我呢類。不過𠵱家我好滿足現狀，影圈行埋都係靚仔靚女，我呢類型其實少之又少，咁樣先企得硬淨，冇人會同我爭飯碗嘛。」
睇好Eason農夫
曾志偉有見影壇出現青黃不接的情況，他衷心希望大家共同努力，為影壇出一分力。長江後浪推前浪，影壇生力軍，志偉看好誰？他想了一想後開始點將，演員方面他看好唱歌出身的陳奕迅（Eason）和農夫，幕後精英則首選導演彭浩翔。
指藝人三心兩意
志偉和Eason去年在電影《野．良犬》中合作，志偉對他的演技讚不絕口，他說：「我覺得Eason係一個好演員，佢演技唔錯，好有爆炸力，如果可以專注一段時間拍戲，佢喺呢方面嘅成就一定唔差過唱歌。其實𠵱家嘅藝人太貪心，要兼顧歌影視幾方面，其實咁樣會分身乏術，顯得唔專注，記得張學友之前都停咗幾年唔拍戲，全副精力去唱歌，所以佢𠵱家唱歌成績咪咁好囉。」
志偉一向不抗拒與新人合作，他認為每個資深電影人都有義務扶助新人，最近他便與男子組合農夫、江若琳和ILoveYouBoyz等合作新片《六樓后座2家屬謝禮》，他大讚這班電影新人既勤力又充滿活力，他說：「未合作之前，我聽過農夫嘅歌，好有新意，同佢哋相處過，我發覺佢哋嘅諗法好有創意，佢哋會係影壇一股新力量。」
至於彭浩翔執導的電影《大丈夫》，志偉都有份演出，彼此擦出很大火花，志偉盛讚他說：「佢真係天生食呢行飯，佢有好多建議，創意無限。」
讚愛兒明日之星
演藝界老行尊曾志偉，有子女繼承衣鉢，兒子曾國祥近年偏向導演方面進發，女兒曾寶儀則在台灣主攻主持綜藝節目。
分享失敗經驗
要志偉在時下一批新晉導演中選出最具動力和潛質的接班人，他表示不是賣花讚花香，他還是看好自己的兒子曾國祥，他說：「其實要點名讚佢，我都會唔好意思，我留意過佢嘅作品同構思，佢的確喺呢方面係可造之材。佢喺導演方面嘅成就，相信會比演戲大。」故此他很鼓勵曾國祥在導演方面多下工夫。
為了栽培兒子成材，志偉不時會過兩招給兒子，他說：「我得閒就會同個仔傾偈，將自己以往碰壁嘅經驗同佢分享，其實𠵱家唔興捉住隻手教佢嘢嗰套，始終做導演要有自我風格，佢copy我嗰套都冇意思啦。我喺呢行行咗咁多路，一定有行錯嘅時候，我會將呢啲錯嘅嘢拎出嚟提點佢，唔係老竇話乜就跟住，呢套方法唔合時宜啦。」
女兒啱做主持
至於主持綜藝節目時口齒伶俐的寶儀，志偉指她非常適合擔任主持工作，他說：「囡囡好有分析能力，好適合做主持，佢可以將開心同歡樂帶畀觀眾，呢份樂趣畀佢嘅滿足感都好大。」
在螢幕前，甚少見到志偉跟國祥及寶儀一起上陣，志偉說：「呢啲嘢唔使刻意安排，成事自然會出嚟，我好主張大家自由發展。」
話係知
香港國際電影節曾志偉電影場次
電影：《最後勝利》
放映時間：3月18日（12:30pm） 地點：科學館
電影：《雙城故事》
放映時間：3月18日（2:30pm） 地點：科學館
電影：《貓頭鷹》
放映時間：3月19日（1:30pm） 地點：太空館
電影：《安樂戰場》
放映時間：3月19日（3:30pm） 地點：太空館
電影：《半支煙》
放映時間：3月20日（1:30pm） 地點：太空館
電影：《知法犯法》
放映時間：3月21日（10:30am） 地點：科學館
電影：《九降風》之台灣篇（首映）
放映時間：3月21日（7:15pm） 地點：文化中心
電影：《九降風》之中國內地篇（首映）
放映時間：3月21日（9:45pm) 地點：文化中心
電影：《江湖》
放映時間：3月22日（10:30am） 地點：科學館
電影：《小小小警察》
放映時間：4月4日（2:30pm） 地點：科學館
資料來源：香港國際電影節
