白鴿黨涂謹申同單仲偕一齊喺九西參選，兩個人都忐忐忑忑，港島區和氣啲，楊森主動唔玩，甘乃威有機會排頭位，表現似乎寬容得多。噚日民主黨港島區支部舉行新春團拜，切燒豬時佢一手攞起大刀，唔係做低阻佢上位嘅大佬，而係一刀劈落隻豬度。
甘乃威平日斯斯文文，拎起把刀切燒豬似模似樣，佢同八方講，唔係扮嘢博上鏡，佢真係識切燒豬，事關佢爸爸喺上環開燒臘舖，佢讀小學時，豆丁咁大已經落舖頭幫手，大個少少就學切豬。
噚日有機會再次揸刀，甘乃威不無感慨，佢話當年父親想佢子承父業，但由於開燒臘舖全年只得年初三赤口放假，佢嫌辛苦，寧願參選做議員，點知做落先知議員全天候工作，仲辛苦過斬燒臘，如果當年接手老竇把刀，今日就唔同晒咯。