今集新增「讀者激鬥」環節，Andy和邪童就曼聯對阿仙奴這場英足盃大戰拗到面紅耳熱。前者認為連續兩場失分的紅魔輸梗，至於邪童就話打波一場還一場，曼聯剛輸完畀曼城，更加要追。
藍鑽石心水推介
星期六33曼聯勝阿仙奴1:0（6倍）
星期六48祖雲達斯勝羅馬2:1（8.5倍）
星期日12錫菲聯負米杜士堡1:2（7.5倍）
M：Mike 藍：藍鑽石 邪：邪童 A：Andy
M：今集我哋有個新環節，就係「讀者激鬥」。搵咗兩位勁人，講吓曼聯對阿仙奴呢場足總盃大戰。
藍：佢哋就係Andy同邪童。
M：咁不如由邪童講先，由佢講吓有咩理由要捧紅魔。
邪：我係阿仙奴fans，不過今次紅魔有主場之利，大家實力咁近，有7萬幾球迷打氣好緊要。
M：Andy，邪童話紅魔靠奧脫福主場就可以剋住阿仙奴噃，你又點睇？
A：講往績，上季阿仙奴兩遇曼聯都贏波，而且兵工廠今季只係輸過畀米杜士堡（編按：尚有聯賽盃不敵熱刺）；加上曼聯上次主場輸畀曼城，阿仙奴就作客都贏3:1，可以睇到兩隊實力嘅高下。
M：呢場波馬會開出讓球盤，曼聯主場少讓平/半，好似好筍咁。
邪：好難只係以曼城嗰場嚟計，因為踢波一場還一場，點可以一場波作準？而且計前中後3線實力，曼聯都比對手佔優。
M：3線實力都高過你噃，睇吓Andy點招架先。
阿仙奴全民皆兵靠得住
A：身價就曼聯貴啲，但我check過，曼聯中後場就只係里奧識入波；反觀阿仙奴嘅加拿斯、法米尼同辛德路斯都有多於一球「士哥」，整體入球能力高啲。今場阿仙奴仲有高路托尼等非洲兵回歸，更值捧場。曼聯今季都輸咗4場咁多，仲要讓平/半，今次阿仙奴食硬半格。
邪：今次曼聯主場，要讓波就好應該，唔使讓嘅話你仲驚，肯定人人都買晒阿仙奴。而且你講到阿仙奴後衞入波多，其實後防球員最緊要係「清波」。
M：呢輪艾廸巴約同基斯坦奴朗拿度（C朗）喺射手榜爭崩頭，你估邊個會開首球，最後又係邊個贏到英超神射手？
A：要貼呢啲，都係揀番個正前鋒好，艾廸巴約應該佔到上風。
邪：我貼C朗；因為艾廸巴約唔快，變速能力同C朗差好遠。
藍：我自己都係捧曼聯，因為佢哋上仗輸咗畀曼城，戰意高啲。
M：睇嚟今次係紅魔躉佔上風，好，今集〈拉闊〉就推介呢個紅魔上盤。
老婆吩咐捧紅魔
今集撞正情人節，與太太一齊玩的Alan，就坦言不敢與「曼聯躉」太太作對，所以再捧曼聯贏波。Alan上仗買曼市打吡戰開「大」，結果驚到一額汗；今次之所以繼續捧紅魔，因為Alan估兵工廠今仗未必出強陣，反而紅魔在英超失地太多，應會專心爭盃，所以捧主隊贏波。
另外一場意甲大戰，Alan信晒藍鑽石，認為死敵碰頭，一定不留手，兩軍鬥攻之下，開梗「大」。
Alan貼士
星期六33曼聯勝阿仙奴2:0（7.5倍）
星期六48祖雲達斯勝羅馬3:1（16倍）
星期日12錫菲聯勝米杜士堡2:1（9倍）
勁彈足智彩好乏味
由英國回歸香港的KK，繼續支持〈拉闊足球場〉。他今次再捧愛隊阿仙奴，認為以球隊現時的狀態，沒理由不敵連續兩場失分的曼聯。KK認為，阿仙奴整體的攻力及實力都在對手之上，加上食住聯賽4連勝的氣勢，今可再下一城。
問到KK回港之後有沒有賭波，他就指與英國五花八門的賭波方式比較，馬會足智彩的選擇實在少得可憐；難怪KK笑道，他回港之後一次波都未買過。
KK貼士
星期六33曼聯負阿仙奴1:2（10倍）
星期六48祖雲達斯和羅馬1:1（6倍）
星期日12錫菲聯勝米杜士堡1:0（8倍）
送你熱刺主場球衣
今集以webcam打入嘅讀者，除咗會由我哋幫你買3串7波膽，講得最好嘅讀者，更加會得到熱刺主場球衣；獎品咁豐富，仲唔即刻上網登記？
〈拉闊足球場〉下次舉行日期：21/02
想參加？即上 http://soccer.atnextcom/jp/soccer
節目重溫： http://sport.appledaily.com
