豬年贏到鼠年後，〈開倉〉版已3連勝，歸本在望，但不感壓力，策略仍是保守為主，重心場次捨棄內部問題多多的盃賽王高雲地利，反捧作客的西布朗贏波，殺入足總盃8強，配腳取英冠聯查爾頓殺低「1哥」屈福特同AC米蘭W。
小弟過去足總盃兩圈捧高雲地利，獲利不少，不過，賭波講感情，真係會輸到瞓街，今次掉轉槍頭，理據多多。首先，高雲地利近期走勢真係不復早前，聯賽仍徘徊有極大降班威脅嘅第19位，財困及內部人事關係，歇冬期只買入甲組華素爾左後衞丹爾，之後領隊杜維突被炒魷；戰績計，近4戰3仗無波入，周中聯賽對卡廸夫城互交白卷，保住1分，而下周二還有一輪聯賽作客對錫周三演護級大戰，有後顧下，主場受讓亦難看好。
查爾頓有「福」氣
近期失去「1哥」位的西布朗，周中圍攻錫菲聯下亦只踢成0:0，但莊家仍開出要他們作客讓球，可能看過上次兩隊在11月對賽，高雲地利主場早段有「蚊子」米蘇特被逐下慘負0:4；但西布朗該役未有王牌射手菲臘斯壓陣，加上下周中無波踢，可以專心在足總盃爭晉一級，兵源遠勝高雲地利兼擅主攻，頻密賽程下，更顯優勢，少讓放心捧場。
配腳，取英冠聯賽事查爾頓氣走「1哥」屈福特。今屆英冠前列爭持激烈，「1哥」位輪流坐，屈福特實力暫未可坐穩；反而查爾頓主場硬淨，今季足智彩兩次開查仔主場讓平/半，分贏史篤城及水晶宮，開平手盤則和西布朗，賽績極硬淨，現時排第5位，要採取主動爭3分，否則難望打入前2，直接升班。
另外，本想唔講感情，捧曼聯在足總盃贏料派較弱陣容的阿仙奴；但思前想後，都係無謂情感對冲，尾關博話明長追的AC米蘭啦！
近5場往績：贏贏贏輸輸
蘋果波神
英超波癡有一個心願，5月話你知！