食住今年北京奧運個勢，有線驕陽電影將開拍一套以奧運精神為主題嘅電影，為隆重其事，驕陽電影總裁、已經18年冇執導嘅徐小明重出江湖親自出馬做導演，內地政府對於呢套戲更大力支持，到時仲會有內地各省嘅武術冠軍參與拍攝。有成個大中華巿場做後盾，套戲暫定投資約4,000萬港元，毫無疑問會係驕陽今年出擊嘅第一重頭戲。
圍繞中國武術
呢套戲嘅背景係30年代，講述中國武術隊去到柏林奧運會時嘅精采表演，令人嘆為觀止之餘，中國武術仲得以喺歐洲發揚光大。馮仁昭收到風，有線今次打算力捧旗下嘅女藝人做呢套戲嘅女主角，仲諗住會喺兩大花旦吳天瑜（Debbie）或者黃翠如（Priscilla）中揀一人，𠵱家成個有線都知佢兩個為咗爭做女主角，唔妥到出晒面，大家見到面冇偈傾之餘，仲各自出招搵徐小明力sell自己，聽講搞到小明哥好頭痕咁話。