「沙士英雄」沈祖堯接任逸夫書院第四任院長，佢噚日喺就職禮上公開「私相簿」，教授為人正氣，梗係唔會畀啲教壞細路相片大家睇，佢show咗多幅自己影嘅風景照，包括黃山、周莊等地，好壯觀。
睇相時沈教授一路吟詩，話如果唔將知識薪火相傳，就會好似「滾滾長江東逝水」咁流失，所以佢矢志投身教育。近排網絡發生嘅事好受關注，沈祖堯話睇唔過眼時下青少年掛住上網，日後會爭取時間多同學生接觸，將佢哋帶離網絡世界，關心多啲家人同社會大事。
高教界「大鑊飯」年代不再，大學要求教授多做研究、多交論文表現工作效益，沈祖堯卻認為咁做唔妥，如果教授只顧研究，又點傳授知識畀學生呢？所以佢會分配好時間，唔會兩頭唔到岸。