《頭D》藍光飄移　把聲靚似落場鍊

Blu-ray氣勢越來越強，今時今日大家關注的已非BD與HDDVD的陣營之爭，而是Blu-ray浪潮是否終會完全吞沒DVD？本周話題作BD版《頭文字D》，畫質之靚已是意料中事，一落場試碟，連AV專家都話聲效的獨特立體感，靚到好似自己落場一樣。

記者：洪偉順
攝影：伍慶泉
鳴謝：D&MSalesandMarketing(H.K.)Ltd.（25166862）

聲效無壓縮一級棒

講明呢套係一部講山路亡命賽車戲，當然唔少得刺激鬥車場面，但係Blu-ray版的聲效更是正到令人熱血沸騰，超有現場感。William一睇完就讚口不絕：「聲效做得很出色，普通DVD版的《頭D》一直是我們用來試機的心儀靚碟之一，現在Blu-ray版因為採用PCM5.1聲效格式（以前用的是DTS6.1聲效格式），聲音沒有經過任何壓縮，原汁原味。任何鬥車動作發出的聲音都可以聽到，可以說是聲音的層次感分明。」現場測試兩版本，Blu-ray版可以聽到車胎跟地面因高速磨擦發出刺耳的「滋、滋」聲，但普通DVD版就無晒呢回事。除了層次感強烈外，聲效的包圍性也很高，「見到車從面前快速經過，產生的聲音也會跟住車的來去，從遠到近，再慢慢散去，這就是聲效的伸展性高的效果，一般的早就聽不到。」

D&M市場及產品經理
WilliamChang

■Blu-ray版就是採用了PCM5.1格式，配上48kHz，為影片創出震撼音效。

《頭D》敵、友起底

■余文樂係周杰倫第一個對手，當然慘敗啦！

■陳冠希係戲中唯一同周總鬥智鬥力的對手。

■見到女仔就流鼻血，杜汶澤極搞笑又搶鏡。

■除一大班年輕明星，睇好戲有秋生同B哥。

港產BD要支持

現時市場上的Blu-ray碟大部份都是西片，港產片十隻手指數晒。可幸推出Blu-ray碟的港產片都有一定質素，例如《無間道》級數是賣座保證，又如《導火綫》的聲畫質素足以成為試機靚碟。而本周登場的另一港產片《頭文字D》Blue-ray版，改編自史上最強日本飆車動漫，AV專家WilliamChang就指：「呢隻《頭D》沒有太多的Remake，只是把當初拍完作電影放映的原版拷貝放入Blu-ray碟，維持一秒24格放映速度，等同人肉眼睇1秒24格的速度，所以觀眾睇Blu-ray其實會有點慢的感覺；而普通DVD只是把原有的1秒24格強行拉長至1秒60格，實質內容無變，但由於60格中好多格都是重複的，所以畫質會有搖晃，只是《頭D》DVD版多黑夜場面，所以觀眾不易察覺。」咁講法，絕對有理由買番隻珍藏。

■喺車頭裝上大鐵架拍攝，怕唔怕失重心。

Making片段

■其中一位特技飄移替身，周杰倫都係靠佢。

■拍山路飄移咁危險，喺日本都要燒豬拜神。

畫質遠景見真章

Blu-ray對畫質的提升幾乎是指定動作，William指出《頭D》畫質的反差加強是整套片其中一個大賣點。「反差」兩個字可能你聽唔明，咁講啦，今次《頭D》入面所有出現的車輛，你可以睇到每一部車的車面都好令身，反晒光，架架好似擦咗油咁；而普通版DVD就又灰又暗，啲黑色車睇少眼都見唔到，車的質感唔夠突出。另外比較兩個版本，William指兩者的近鏡分別不太大，但一去到遠景就即刻唔同晒，Blu-ray版仍然能保持背景細緻、色彩實淨、雜訊微粒少的效果。搞到我睇完Blu-ray碟即時中晒高清毒，開始接受唔番普通DVD影碟㖭！

Blu-rayVSDVD