韓劇《朱蒙》男星宋一國被控告喺上月中暴力襲擊月刊女記者，前日下午佢去到首爾中央地方法院，接受測謊機問話調查呢單羅生門，結果將於日內公佈。嗰位受害女記者原定亦喺當日接受測謊機調查，但檢查廳一直聯絡唔到佢，所以就冇出現，唔知係咪臨時縮沙呢？另外，宋一國嘅研究生未婚妻噚日正式被任命成為釜山地方法院判官，希望可以為宋一國冲喜吓啦！