立法會噚日搞春茗，請咗煲呔同多名局長、行政會議成員食飯，平日官員去立法會俾議員鬧，議員可能心有歉意，噚日粉墨登場娛賓，四個議員同傷健人士一齊用手語表演《憑着愛》同《信自己》兩首歌，公民黨黨魁余若薇手語好純熟，全場觀眾拍爛手掌。
贈議員滑鼠迎節
最後一次以主席身份主持春茗嘅主席范太，話自己冇乜離愁別緒，最希望留低美好回憶。范太噚日詩興大發，引用陶淵明《歸園田居》中「晨興理荒穢，帶月荷鋤歸」兩句，勉勵議員雖然工作時間長又成日俾人鬧，但能夠為市民服務都係值得。
有人將拜年禮物循環再送，原來范太都好環保，送咗一對瓷杯畀煲呔，呢對杯係國內名廠送畀佢，佢借花敬佛轉贈煲呔。今年鼠年，范太每個議員送一隻滑鼠，實用又應景。煲呔啱啱抱孫，噚日猛晒幸福，話自己呢輪要去少啲個仔屋企，因為家人鬧佢霸住抱個孫女，又驚佢縱壞個BB女喎。
全城熱話淫照，白鴿黨肥仔明話鬍鬚曾、孫公同俞宗怡等高官都話冇睇過啲相，俞宗怡同孫公都話政府電腦好亁淨，睇唔到呢啲嘢，議員半信半疑，笑佢哋可能朋友少啫。