幾十個記者噚日去屯門裁判法院採訪網民鍾亦天案件，一名年僅14歲嘅小記者黃天佑亦到場湊熱鬧，佢攞住部手提攝錄機喺十幾個攝記中間穿來插去，幾經辛苦終於拍到鍾亦天戴口罩離庭，雖然見唔到全貌，佢話已經好滿足。
天佑家住天水圍，讀中二，志願係做記者，年前天水圍有單三個女人自殺慘劇，好多人話天水圍係悲情城市，佢認為唔係，就拎住部機好似記者咁拍低身邊事件真相，日前網民遊行佢都有出動。
記者採訪後會出報紙、電台、電視新聞，天佑一腳踢剪片、配音後，就將條片放上YouTube，透過網絡報道新聞。天佑話好同情鍾亦天，認為佢係無辜，至於有冇睇過淫相，佢諗咗一陣，搖搖頭話冇。