我車報員覺得今年將會係Mazda大展拳腳嘅一年，點解？仲使問嘅，大家一齊嚟數吓啦，佢哋先引入咗玩城市細車Feel兼主攻年輕人市場嘅新一代Mazda2，跟住又Launch埋走中型房跑車路線嘅新一代Mazda6，加埋佢哋嗰部可以享有環保車稅務優惠嘅Mazda8，淨係呢3款車都已經令到其他代理陣腳大亂，搞到個個都要變陣迎戰！
哈，原來唔只咁少嘢喎，我車報員早兩日收到風，話代理已經將Facelifted新款Mazda5運咗嚟香港，而且仲會喺今日進駐佢哋個灣仔Showroom。雖然新車喺外觀上嘅改動唔係太多，主要集中喺鬼面罩、尾燈同埋新款16吋合金胎軨，但睇落明顯比以前醒目得多。至於車廂方面，新車改用咗杏色做主要色調，兼且加埋中後排冷氣出風口，明顯改善咗乘車環境。另外座椅亦換咗由真皮鑲嵌嘅款式，方便乘客上落嘅電動遙控雙趟門亦得到保留。機械配搭方面，新車仍以2.0公升直4MZR引擎作核心，但由於加有S-VT技術，令動力輸出數值分別為145匹同18.6kgm，就連波箱亦變咗做最新嘅5前速半自動款式，令起步加速表現更強之外，亦有助減低耗油量。聽聞新車嘅售價由$159,990起，有興趣嘅車迷可以佢哋嘅灣仔Showroom睇吓喎！
記者：車報員
查詢：萬事得汽車（28931112）