終於，彈的彈了，鬧的鬧了，剛過去的新年，還是沒有人捨得唔入戲院睇《長江7號》。電視三台輪播星仔舊戲，天寒地凍一家人追到夜一夜；影碟店開了一棟棟周星馳專櫃，我也恍如被鬼迷入了3隻碟。
做粉絲，有很多種玩法，睇齊戲買晒碟是一種、拉banner吹BB尖叫是一種、替偶像找證據堅稱疑似淫照是移花接木又是一種。台灣的九姑娘和梁無雙，選擇跟着周星馳的腳毛去旅行，走遍香港寧波上海銀川尋找周星馳電影場景，順便模仿經典對白甫士──在石澳扮《喜劇之王》鵪鶉樣、裝假牙揸雙刀在油麻地喪跑重演《食神》雞姐劈友等等。為了忠於一本旅遊書的本份，二人細心查找景點周邊吃喝交通資訊，讓人玩得痛快去得便利，有如主題式《LonelyPlanet》，如果我咁啱又係台灣星爺粉絲，肯定左手買書右手book機票去香港旅行。
可惜我是香港人，石澳我也曉去，甫士我都識擺，但好怕擺完被人笑，因此我絕不可能將《下一站，周星馳》當旅遊書睇。不過，冇用又如何呢？睇人玩一樣開心。
記者：劉嘉蕙
《下一站，周星馳：星爺當導遊，你們說好不好玩啊？》
作者：九姑娘/梁無雙
出版社：漫遊者文化
定價：$99（阿麥書房28080301）