《黃偉文自我簡介》填詞人，其實最鍾意買嘢，最憎寫字，星期日盡可能唔寫字，去買嘢。Textby黃偉文
終於找到那條Lanvin的單肩裙，而且剛好是你要的綠色，34令你腋下那嚿肉唧了出來，38你加兩對缽仔糕都唔得掂，店員卻說全香港只得一條36但已給某熟客hold了，在這個情況下，你會？
A．錯誤示範：同售貨員講：「即刻同我call你個熟客問佢要唔要，佢唔要我𠵱家同你買咗佢，即刻！」
B．正確姿態：不動聲色，耐心等待，並千叮萬囑售貨員不要催那位熟客做決定，當然不忘交帶一句：「如果佢唔要，馬上打畀我，我九秒九仆嚟碌卡！」
咪話我唔當你自己人，唔怕話你聽，3年前的我一定揀A，軟硬兼施冰火五重天全套做齊，輸了儀態嘥了演技，結果成功率低於30%，要過了很久很久，迫售貨員打了很多很多個電話，miss了很多很多件心愛的衫，我才明白，揀B還有五五波勝算，出A反而壞事，3成機會都冇。
契機是，直到有一天下晝趕歌詞趕到隻積咁，忽然有個相熟boutiquesales發短訊給我，留urgent，要速覆（話時話，我最憎人有事冇事call我留urgent，呢個世界真正值得urgent的突發事少之又少，俾我發現你亂用urgent，肯定鬧鑊甘！），我嚇到以為她有friend撞了車急需AB-型血，馬上放下手上趕工中的一切回電，誰料她卻說：「你前日keep咗嗰件褸家陣喺舖頭有第二個客想要，叫我即刻call你問你係咪愛？你唔愛佢即刻畀錢。」那件褸顏色唔錯，但後幅細咗少少有啲迫，我本來十五十六唔sure要唔要想諗多兩日，𠵱家唔使諗咯，要！要硬！只因為要爭的東西份外馨香。我或者不在乎買錯了件褸的那萬二蚊，但我肯定介意比賽輸了的那啖氣。
叮！
大悟！
從此，如果我心愛的東西我暫時無權擁有，位置落在候補候候補以至waitinglist的龍尾，我會按兵不動，一心急，等於親手毀了自己的唯一「餐屎」，自斷米路。
附贈的第二啓發是：促使你激發所有體內潛能去做一切（對的與錯的）事的最大原動力，乃是「你不是第一名」，又曰「非正選」，總之，你只是在有得睇爭啲才有得食的waitinglist之上，永遠的儲君查理斯王子。
高人一等
噢！WaitingList！多麼偉大的發明啊！一早宣佈「你冇行嘞」還可以叫人及早死咗條心，否則排第1,649還是有得wait，只要前面1,648位都有冬瓜豆腐自願或被迫退出，你就有機會當選了，你又點捨得放棄？
我在倫敦BondStreet的YSL詢問有關今季最精警的星星項鏈，售貨員說實貨未到但已有很多人感興趣，她說：「Don'tworry,I'llputyouonthewaitinglist」，之後我又去check那件潑墨男裝夾克，她㩒完一輪電腦揭完一輪數簿，仍是同樣的對白。坦白講YSL今夏的男女裝我都睇高一線，男裝的油彩很攞彩，女裝的星星有星味，但恐怕未至於行入shop是但指件嘢都有水蛇春咁長的waitinglist啩？肯定是shopmanager教她們講的，凡未有貨在手你都跟客說有張很長的等候名單啦，到有貨來那天你就打電話給客：「喂，啱啱多咗一件專登keep起咗畀你喎！」，銀両便自己撬開櫃桶直接跳入收銀機，落嘴頭sell客都可以慳番！
傳統絕招「新貨一到我第一時間call你」還不夠爆炸力呢，點及得上同人爭但你爭贏咗有成功感？
所以但凡聰明的零售商都應該有班不存在的大客和有張隨口噏的waitinglist。
又，在倫敦，早一星期打去名廚GordonRamsay的餐廳訂張枱，他們說情人節成個禮拜甚至成個月都爆到唔清唔楚，「咁午餐呢，午餐有枱我都殺。」還是得到一句發音明明是sorry但語氣並無斗零sorry情緒的對白，又求又拜搞了15分鐘還是不肯格外開恩。只應承將你的名字拋進茫茫無底的waitinglist，名副其實的壓軸。
誰料不到15分鐘，店家方面又打來說剛剛有客取消了訂枱，×月×日星期×晚上10:45分你可OK？我梗係𦧲飯應𠺝，直頭cancel了另一間較少星的食肆booking，按時前往Claridge'sHotel等開飯。
結果，有七成的枱是吉的，O乜嘢ver-book吖？枱是一早預了給你的，可是老細規定一定要玩吓嘢，順便營造一下「一枱難求人氣店」的台型。
結果，食物OK，同行的人卻反問：「你覺得啲嘢好味係唔係因為張枱是爭崩頭爭回來的，是waitinglist令它好味？」
不幸我覺得是真的。
本周後記
翌日在Selfridges的foodhall，見有保衞爾牛肉汁的心形樽情人節limitededition，幾乎想買。
看waitinglist個親戚「限量版」都出來博大霧了。
老友，請記住，這個世界上所有受做物都不會是無限量的，你今朝早餐個菠蘿包，餅舖都只是焗了200個，都是limitededition呀，你怕聽朝食唔到，今晚又使唔使迫美心東海堂聖安娜生張waitinglist擺你個名落去先？
