因為將一張不雅照片上網就俾警察又拉又鎖嘅鍾亦天，失去自由兩個星期，噚日終於獲當庭釋放，唔使繼續坐寃獄都算好彩，究竟無端要被「通櫃」嘅鍾亦天慘啲，定係淫照幾個女主角或男主角陳冠希先係受害者，真係有排拗，陳冠希（EDC）老闆岳少噚日開口，要EDC盡快交代事件，八方認為岳少如果真係想幫EDC，應該做多啲嘢。
岳少近年事業得意，搞娛樂生意有聲有色，一套三集《無間道》名利雙收，好多人話都係多得泰國白龍王，岳少得佢作福指點迷津先風生水起，事實上岳少真係好信白龍王，拍戲開工、開鏡都要先問一聲白龍王，而每年正月十五，佢更會拉大隊去泰國拜見白龍王祈福。
點醒EDC兼趕小人
今日係正月初十，按慣例岳少應該未出發，佢早前單超速官司搞到滿城風雨，淫照風暴又唔知幾時收科，睇嚟似乎有啲運滯，佢可能真係要快啲去搵白龍王轉過運好啲，最緊要係帶埋EDC去，等白龍王點醒吓佢。
調查呢單案嘅警務處助理處長黃福全同一哥鄧竟成，因為又儍又天真而成為全民「箭豬」，如果岳少有義氣，八方建議佢叫埋兩個警官去見白龍王，幫佢哋洗洗衰氣，亦當幫香港人做番件好事，等洞悉天機嘅白龍王教精佢哋，返到香港唔好再亂咁拉人，咪再警字兩個口，咁就係香港之福嘞。
據講白龍王作福都分等級，未夠班嘅隨時不得其門而入，裝炷香就過主，有人見過佢用香燭拍背趕走小人，呢招最啱EDC，如果白龍王見到EDC，應該出「行」力拍落佢背脊，否則好難趕走小人。黃sir同一哥唔係行衰運，而係道行未夠，所以白龍王應該出另一招，用木製法器笠喺兩人頭殼頂，敲番十幾廿吓，據講咁做有開運、開竅神效，令佢哋開竅唔好選擇性執法。
相對之下，岳少單超速案好濕碎，八方相信白龍王指示佢「捐」枱底趕走黑氣就搞掂，如果佢驚唔靈，最好搵辦法揸架法拉利「捐」枱底，若然「捐」得到嘅，八方都幾肯定佢以後唔使怕雷射槍、影快相。呢個參拜白龍王善信團咁墟冚，唔差在預多個位，律政司司長黃仁龍都應該一齊出發，佢因為告華叔非法廣播而民望急瀉，求白龍王口含蠟燭，噴啖煙幫佢催旺運程最好嘞。