57歲的明叔患有柏金遜症，仍希望自食其力，靠雙手謀生。只是生活艱難，他任職的士司機替工，每月賺取約1千元收入，不足應付生計，而申領低收入綜援金幫補生活。早前他因拖欠交通罰款被法庭「追數」，再不如期繳交便要鋃鐺入獄，他無計可施下向本報求助。
明叔原任職私人司機，自99年被解僱後，人生便一直走下坡，破產後改以駕駛的士謀生。
5年前，他證實患有柏金遜症。雖然患病，為要應付生計，明叔見服藥後尚可控制病情，仍繼續工作。
本報助紓解燃眉
去年底他因逾期繳交罰款被捕，惶恐不已。「啲罰款有成1,800蚊，俾人拉先記起係兩年幾前嘅告票，我搬過屋，一路都唔知法庭追緊我。𠵱家一個月靠的士司機替工同綜援都係2,000幾蚊收入，畀咗罰款，就無得食，都唔知點算。」蘋果日報慈善基金經了解明叔情況後，已撥款1,800元助他紓解燃眉之困。
捐款編號﹕C2508