北角Ben認為工商銀行（1398）會受惠於內地放鬆宏調步伐。
楊：楊慧玲 碩：黃敏碩 欣：李靄欣
Ben：呢排好多人話宏調會放鬆，我想推介工商銀行，因為內地只係加咗準備金，但就一次息都未加過。
碩：工行都幾好，係我嘅第二心水，佢有規模效益，第一隻銀行走出去做併購活動，加上發展財富管理業務，同建設銀行（939）一樣，喺淨息差方面有擴闊現象，不過市場始終擔心宏調，現時（工行股價）都喺底部做緊整固，當宏調慢慢放鬆，金融同地產會有推進空間。
楊：工行之前上過6、7蚊，之後跌番落嚟，輪方面係咪都有好多蟹貨？
欣：係，同其他中資銀行股一樣有好多蟹貨，短炒可以考慮買番啲call輪，因為call輪可以盡快令大家止賺或者止蝕。我哋有隻工行call輪（9007），𠵱家都係3毫子左右，而槓桿有5.3倍，今年中先到期。
--北角Ben建議--
建議買入價：5.26元 目標價：6元
止蝕價：4.4元 時期：半年
中信銀行（998）
貪平買最弱嗰隻
黃小姐：好多人都推介國內銀行股，入隻中信銀行（998）好唔好？
楊：中信銀行走勢比較差，好多散戶都已經遺忘咗。
黃：咁係咪差過建行同工行呀？會唔會好過中行（3988）先？
碩：中信銀行現價比招股價可謂一浪低過一浪，自從去過6.5蚊後就輾轉回落，雖然一月中曾有反彈，但走勢始終比較差，𠵱家仲跌穿10天同20天平均線，無論係技術走勢定係基本因素都麻麻哋。
黃：我就係見佢平先買囉。
碩：銀行股嚟講佢算係最弱嗰隻，未來業務前景、競爭力同短期走勢都唔係咁好，如果你睇好中資銀行股，可以喺4.8蚊左右分段走，換馬轉去比較強勢嘅建行。
--屯門黃小姐個案--
買入價：5元 目標價：5.5元
止蝕價：─ 時期：半個月
鴻隆控股（1383）
估值平朋友叫入
Frederick：今日有個朋友問我隻鴻隆控股（1383）點睇，我話不如打嚟問你哋仲好，佢市盈率得2倍，你哋點睇?
楊：呢隻股好少人揀。
碩：其實呢隻唔係一線內房股，仲有買股唔係只睇市盈率，要睇清楚間公司嘅土儲多少同埋地點分佈，仲要睇埋可落成樓盤收益。而鴻隆股價一直喺低位徘徊。
Frederick：隻股高位去過3.5蚊樓上喎。
碩：但係買內房股要注意估值吸唔吸引，而且揀有國企背景嘅公司會比較好啲。如果你真係想博反彈，我建議可以考慮遠洋地產（3377）同埋華潤置地（1109）。
--銅鑼灣Frederick建議--
建議買入價：1.76元 目標價：─
止蝕價：─ 時期：三個月
鞍鋼（347）
鐵礦沙供應有保證
李先生：17蚊買咗鞍鋼（347），有報道話，母公司鞍鋼集團同澳洲礦山企業金達必金屬，一齊開發卡拉拉鐵礦沙項目，上市公司鞍鋼嘅原材料鐵礦沙供應就有保證，對股價應有支持。
楊：大市升4日，鞍鋼嘅股價升4日，股價走勢幾好。
李：係呀，隻股長揸兩個月定係短炒好?
碩：兩個月就似乎長咗啲，到20蚊就差唔多可以先賺一轉。
欣：資源股好受外圍影響，股價連升幾日就要考慮獲利。
李：止賺位應該放喺邊度？
碩：止賺位可以考慮放喺19.8至20蚊之間。
--旺角李先生個案--
買入價：17元 目標價：21元
止蝕價：14.3元 時期：兩個月
中國人壽（2628）
焗揸博上34蚊
關公：個市波動，一早放咗中國國航（753）、中石油（857）啦，𠵱家焗住揸隻中國人壽（2628）。
碩：點解焗揸中國人壽呢？幾錢買㗎？
關公：30蚊囉，唔放因為唔忿氣。
欣：幾時買？
關公：過年前買，隻股上番34蚊難唔難呢？
碩：睇番個圖，隻股喺低位即接近28至29蚊之間都算守得住，有得推進，但近日見到走勢出現裂口，股價似出現一浪低於一浪嘅現象。而股價喺32至33蚊之間的確有小小阻力，要突破到先有新方向。
欣：國壽股價喺27蚊有好強支持，其實國壽個股價短期會喺27至30蚊間上上落落，關公不妨考慮喺呢個區域炒波幅，來回短炒多幾次仲好喇。
--大埔關公個案--
買入價：30元 目標價：34元
止蝕價：27元 時期：長期