花旗股市升咗幾日，前晚終於碌番落嚟，多得伯南克話經濟唔掂同埋次按同借貸危機仲未搞掂，投資者梗係乘機出貨。
之不過伯南克嘅講話有啲伏線畀大家諗吓，佢話隨時會出手防止經濟再急滑，即係話聯儲局會繼續減息，市場𠵱家估計，聯儲局今年內會減多1.25厘息，即係話遲啲花旗股市仲會炒減息。
伯南克又話經過一段減息後，佢估計經濟會喺今年底同明年初開始改善。即係話減息嘅滯後效應到時會發揮，咁就即係唔使再減息，同埋經濟開始好番。大家要記住呢樣嘢，到時如果唔係咁，花旗都幾閉翳，到時可能又要大幅減息，好有可能見番1厘息或者更低。
港股喺花旗股市拖累之下，昨日跌過500幾點，但係晏晝就完全係另一個世界，㗎仔股市大反彈，港股跟住挾番上去，埋單計數，唔使跌仲升126點收市，報24148，係咪轉勢？唔好咁樂觀，挾上嚟畀你炒轉短線已經好難得。
炒影子股概念
中交建C輪4359：中交建（1800）昨收21.15元，全程強勢，拜隻就嚟上市嘅中鐵建所賜，身為「影子股」，梗有吸引力，可以諗吓隻中交建C輪4359，博正股炒上23.50元。隻輪昨收24.3仙，槓桿率8.7倍（有效4.3倍），正股升上23.50元，4359應該喺37仙樓上，正股跌穿70元止蝕。