不要以為看上去很cool的古天樂就一定是很正經嚴肅，原來私底下也不失童真。古仔閒時會看卡通片外，最近為推出一本關於玩具的書，開始儲一比一的figure公仔作深入研究，還特意買下一個地方來擺放收藏品，實行「金屋藏figure」。古仔前晚出席《蘋果》網站直播節目《娛樂開CHAT》時，就向大家介紹他所儲的figure公仔。
適逢昨日是情人節，網友紛紛問古仔情人節如何度過？一向絕口不提私人感情的他，謂要在工作中度佳節。最後來自將軍澳的Venus被古仔選為整晚表現最好的網友，獲得由他設計的T恤一件。大家可登入《蘋果》網站 http://ent.appledaily.com隨時重溫節目。
採訪：林惠卿、懷鈺 攝影：仇志德
買公仔貴到痹 旺角Helen
Helen：Hello，古仔，我頭先聽你講你有儲咗好多一比一嘅figure公仔，咁你係喺邊度買或者訂返嚟㗎？
古天樂：大部份公仔都係網上買或者上網競投返嚟，有啲就係同電影公司訂返嚟嘅。
Helen：咁其實啲figure公仔貴唔貴㗎？
古天樂：因為啲figure公仔都係限量，又要睇限量嘅數目，有啲出100隻，有啲只出10隻，咁梗係越少越貴啦。
Helen：咁你都覺得值得㗎？
古天樂：我覺得唔值㗎，但因為要寫呢本書，想了解多啲，所以先買，因為真係幾貴。
Helen：咁你會唔會再繼續買figure公仔呢？
古天樂：應該唔會喇，因為本書都已經寫完，如果要研究電影方面嘅話，都唔會淨係買公仔啦，就要買多啲電腦嘅program先可以研究。另外，我真係覺得啲公仔好貴，買夠喇！唔買喇！
Helen：咁你會唔會遲啲將啲公仔做展覽，或者再賣出去？
古天樂：暫時都未有呢個諗法，但如果要配合本書嘅宣傳，我都會攞一兩隻出嚟嘅，我都願意㗎！
Helen：咁我希望你本書推出成功啦！
拍戲練普通話 將軍澳Venus
Venus：Hello，你好啊！我聽人講你最近同劉若英同大S（徐熙媛）合作拍戲，咁你啲普通話係咪進步咗好多呢？
古天樂：（普通話）還可以這樣說。
Venus：（普通話）還可以呀？
咁你不如用普通話講情人節快樂畀我哋聽啦。
古天樂：祝大家情人節快樂。
情人節不浪漫 何文田Olive
Olive：請問情人節，你會點過呢？
古天樂：會喺山上面過，因為要拍戲，會凍足一日。
Olive：你會唔會收到好多女仔送畀你嘅朱古力？
古天樂：訪問前先收到兩位朋友送畀我嘅朱古力，仲祝我情人節快樂！
娛樂開CHAT
江若琳、JJ下周輪流上
各位娛樂版擁躉，有興趣和你的偶像傾談嗎？《娛樂開CHAT》第五和第六集將分別請來江若琳和賈曉晨（JJ）擔任嘉賓，江若琳將於下周三（20日）跟網友談天說地，至於JJ就會於下周五（22日）現身，若想一睹兩位靚女的風采，請於當日6:00pm登入 http://ent.appledaily.com即可，節目於當晚7:00pm在《蘋果》網站直播。
