噚日恒豐金（870）老闆林世榮請傳媒食春茗，席間仲送咗隻金老鼠擺設畀大家。佢同華華講，公司每年都會攞嗰年嘅生肖嚟做公仔，由於今年係鼠年，驚隻公仔做出嚟會嚇親人，於是將佢做得卡通化啲，等大家容易接受啲喎！
林生仲話，呢隻唔係普通老鼠，係頭戴烏紗、右手攞金元寶、左手托玉如意嘅福氣（肥）金鼠財神！佢話大家對老鼠太有偏見，其實老鼠頭腦靈活，手腳又快又敏捷，係一個好嘅學習對象，而且邊度有老鼠，就即係邊度有好嘢，吉兆嚟嘅！
對於林生就金老鼠嘅演繹，華華不作評論，但對佢嘅老鼠睇法就有保留。華華諗嚟諗去，真係諗唔到一啲同老鼠有關而又正面嘅詞語，淨係諗到啲好似鼠竊狗偷、鼠輩橫行同埋蛇鼠一窩……最正面嘅怕者都係得米奇老鼠。睇嚟林生要同老鼠洗底都唔係咁易。