佘詩曼近日唔聲唔聲當上小富婆，原來近日她將04年以約400萬元買入的香港仔深灣軒單位放盤，有六位數字斬獲；同時她購入的500萬元北角半山千呎寓所，更大幅升值至1,300萬元，其身家賬面逾千萬。難怪阿佘食得招積，日前往尖沙嘴豪嘆3,888元的鮑參翅肚之餘，更在成都投資茶餐廳，榮升老闆娘大擦特擦。
佘詩曼早前先後飛到美國及加拿大登台𢱑銀，甫到鼠年豬籠入水，故她也不待薄自己，日前往尖沙嘴豪擦富貴餐，由曾任職福臨門酒家逾10年的資深廚師歐陽松基主理鮑參翅肚，讓她品嚐價值3,888元的新年中式套餐，包括紅燒蟹皇翅、六頭南非鮑魚扣花菇鵝掌、金牌炸子雞及生煎菜肉包等菜式，其間阿佘更充任大廚副手，揸鑊鏟親煮幾味，倒算有紋有路。
拒賣風水樓
阿佘形容今次美、加登台酬勞不俗，未知薪酬能否作為供樓首期？她笑說：「都得嘅，睇乜嘢樓啦，有都係投資㗎咋。」阿佘早於04年曾斥資約400萬元買入香港仔深灣軒的655呎高層單位，作為投資用途，早前她將單位放盤，略有盈利，她說：「間屋放咗啦，賺咗六位數，買呢間屋時我當儲錢，但升幅唔太大。」
反而阿佘03年以500萬元買入自住、面積1,200呎的北角半山雲景道香閨，樓價卻大幅升值，她說：「早排地產經紀話有人開價1,200萬買呢間屋，貴多800萬，價錢真係好吸引，不過我冇諗住賣，因為風水好，地區又方便，住咗咁耐都好順。」換言之阿佘現時牌面身家數目逾千萬，她卻笑說：「希望第日做老姑婆時無憂啦，拍拖都係隨緣。」
成都開食店
投資有斬獲的阿佘更在飲食界再展拳腳，以前她曾與安德尊等人合資開設位於佐敦的日本料理店，近日她與曾志偉和鍾鎮濤等大班藝人，在四川成都合資開設茶餐廳，阿佘說：「茶餐廳開咗兩個月，做生意都係講緣份，本來想喺上海或者北京開嘅，但未搵到合適舖位，咁啱成都有朋友想一齊做，所以大家就試吓。自己做咗電視咁多年，都想試吓做第二啲嘢，希望今年遇到好劇本、好對手，同埋想拍電影。」
採訪：朱倬誼
攝影：林德雄
服裝：SistyrMoon
場地：Cucina@MarcoPoloHongKongHotel