全城熱話淫照事件，新正頭八方見到議員高官，互祝拜年未入正題，都係問對方「今日睇咗相未？」老友嘅就順便吹多兩句水，一般熟或者扮正經嘅，一個會心微笑盡在不言中啦。白鴿黨噚日請職員食開年飯，職員向黨內大佬拜年𢭃利是後，大家無心正/政事，都係講淫照，單仲偕同涂謹申睇過相，同大家一齊亂噴口水，惟獨前主席馬丁粒聲唔出，冇搭嗲。
馬丁係御用大狀，平日道貌岸然，大家估佢冇睇過淫相，有人大膽問佢睇過未，佢果然話冇，因為身為天主教徒，既然助理主教下令非禮勿視，佢當然要聽話。不過佢好坦白，話聽人講到眉飛色舞，都不禁心思思想睇吓啲相究竟有幾離譜。
創黨主席有煩惱，即刻有兄弟獻計，話如果淫相主角第日要搵人打官司，馬丁可以接咗單官司，屆時就可以睇證據為由，大條道理奉旨睇相啦，仲可以逐張仔細研究，唔可以睇漏任何蛛絲馬迹㗎。有人提出呢條絕世好橋，據聞馬丁聽完得個笑字，冇嘢講冇表態，有乜算盤佢自己先知嘞。
仁哥嘆自己太天真
馬丁為咗淫相內心掙扎囉囉攣，主席何俊仁就好似阿嬌咁慨嘆自己太天真。唔係啩，仁哥都有影淫相！？唔係，佢都冇睇過，只係當年阿嬌被人偷影換衫相，表現得好凄凉，仁哥帶隊抗議為阿嬌申寃，𠵱家淫照曝光，佢先驚覺自己真係好儍同天真，黨友見到仁哥個樣悔不當初，仲慘過阿嬌咁款，都唔知點安慰佢，涂謹申就事後孔明，話好彩當日冇跟大隊去抗議，否則就同仁哥一樣，成為淫照風波另類受害人。
男人想睇淫照好正常，八方估唔到連葉劉都話有啲興趣，不過佢話至今只睇過傳媒刊出經裁剪嘅相，冇睇過網上「足本」淫照，佢強調唔係清高或扮純情，只係冇乜朋友啫！葉劉講到出口自嘲，各位葉劉友好識做啦，不過八方提醒大家，葉劉以前係保安局局長，傳啲不雅、淫褻相畀佢後果自負。
葉太好開放，話呢單嘢本來係男歡女愛嘅事，冇流出街唔會咁大煲，佢話既然阿嬌都已現身，陳冠希仲匿埋似乎冇乜道義。葉劉又話警方今次都好難做，對夥計壓力深表同情，希望佢哋盡快破案。