找劉晉介紹「大廚飯堂」，原本打算叫這位現任「黃色門廚房」掌門人推介西餐，佢話：「我喺屋企請客，都係煮西餐為主，所以我甚少出外食西餐；反而因我落場時間唔多，少少哋食碗麵啱啱好，麵檔我會熟啲，我最鍾意去啲有人情味嘅食肆。」最後我們去了他經常「寵幸」的飯堂，原來是兩間生意滔滔的麵店。
記者：張一豪
攝影：梁細權
劉晉
在澳洲修讀建築，修得一手好廚藝。回港後卻愛穿梭街市和廚房。酷愛周遊列國嚐美食，將經驗在黃色門廚房及報章雜誌中與人分享。最新搞作為「蘋果網上直播」中當主持，示範廚藝。
手打麵超過60年
一盤生意如果可以經歷三代，開檔超過50年，相信下一代再開分店，也會大張旗鼓。不過深水埗有家麵店，雖然老字號，最近開分店，卻沒雕龍砌鳳，在原區附近開一家平平實實的店，這家麵店名叫「劉森記」。劉森記現在做到第三代，現任負責人叫昌哥，原來昌哥阿爺早在1945年已開始在廣州做麵，55年來港在深水埗擺檔，後由父親接手，直到現在，由昌哥主理。
麵質唔易發脹
劉晉對這裏的麵讚不絕口：「呢度啲麵最出名係由老劉生打麵，因為用竹昇打，麵質特別爽口有彈力，最明顯唔同係就算浸湯耐咗，都唔會發脹變麵糊，而且仲好有彈力，呢種麵喺香港已經買少見少喇。」據說劉森記現在開了分店，麵不夠用，連昌哥的弟弟也要來幫手打麵。
蝦子麵了得
這裏除了手打麵了得，蝦子、雲吞和水餃都很出名。「我哋用好多蝦子，三日左右就用上十斤，但絕對唔會一次過炒定好多，寧願用完再炒，咁先至唔會令蝦子走味，以保持最香狀態。仲有雲吞水餃入面嘅肉餡，我哋都唔用攪肉，而係麻煩啲用人手切肉粒，咁食起嚟口感好好多，所以好多人食過都會返轉頭。」昌哥透露了一點玄機，原來即使材料貴，人工越來越高，他都堅持製作方法，令一間其貌不揚的雲吞麵店，繼續屹立不倒。
昌哥
劉森記第三代主持人，11歲開始在麵檔幫手，堅持對麵質有高要求，食物不會預先做好翻熱，盡量做到即叫即做。
劉森記麵家（23863533）
地址：深水埗福榮街82號地下
營業時間：12:00nn-1:00am
親切清湯腩
和劉晉相約在「華姐清湯腩」見面，華姐看見劉晉後，難掩興奮之情：「阿俊細細個就嚟食麵，食到咁大喇。」說罷立即端出幾碗牛腩給我們試食，味道先不說，單是華姐的熱情，便是食店的最好調味料。劉晉以前住北角，常到這裏吃麵，不只因清湯腩水準高，華姐的親切態度也是留住人心的理由。
崩沙腩口感最正
未吃，劉晉已分享他的心得：「粉麵舖用嘅牛腩係一副牛胸到腹部以下嘅肉，呢塊肉其實分好多部份，包括牛味最濃嘅坑腩，係胸骨嘅腩肉；牛肚皮嘅腩位係爽腩，有塊薄軟膠質筋膜，肉質爽軟不硬。爽腩同坑腩中間嘅係腩角，較肥美，華姐最愛。仲有集坑腩同爽腩優點嘅挽手腩，味濃煙韌。我自己最鍾意爽腩下面嘅崩沙腩，有肥有肉又有筋，口感一流，配米粉索埋啖湯，正！」
向老爺老公偷師
我們試吃過爽腩、崩沙腩及牛胸，各有不同口感及味道，但同樣夠腍入味。「我無乜秘方，都係用果皮、八角、紅棗、薑等，但就靠經驗，牛腩嫩嘅燜兩個鐘就得，如太老，八、九個鐘都有可能。我無學過廚，但老爺老公係廚師，所以我偷吓師囉。最開心係熟客唔止嚟食麵，仲想見多我幾面。哈哈哈！」
華姐
真實年齡不詳，入廚有一個甲子以上，煮腩經驗超過20年，能憑腩上肌肉紋理，猜出牛腩的老嫩，捧場客包括食家及明星。
華姐清湯腩（28070181）
地址：天后電氣道13號地下A1舖
營業時間：11:00am-11:00pm