過去一個禮拜，英超3強曼聯、車路士及利物浦齊齊失分，阿仙奴贏波穩坐榜首位，投注者都應該搵「兵工廠」幫到手。
雖然曼聯呢支同樣都有好多擁躉嘅班霸，剛剛喺同市打吡戰，主場爆冷輸咗畀今季由艾歷臣領導之下、大有起色嘅曼城，但係〈球蘋家〉入面都有聰明醒目捧場Blog友「lorry」，冇畀牌面因素迷惑到，吼中曼城冷W，仲射埋贏打比郡3:0嘅熱刺W，可惜差少少嘅係利物浦前鋒高治幫唔到手，如果唔係利物浦贏埋車路士的話，佢條過三關飛就收晒錢過肥年囉。
另外，由〈蘋果波經〉眾名家提供嘅「即場來料」，都非常有貢獻，本報名家賴恩，就喺上周六畀出熱刺贏打比郡3:0波膽，中到正！所以由我蘋波人主理呢個〈球蘋家〉部落，唔多啲上嚟睇下就真係走寶喇。
Blog友回應
阿仙奴能否自03/04球季後，於今季重奪英超冠軍？
Matthew：阿仙奴班波今年重現當年不敗奪冠的水銀瀉地式攻勢，早前因為傷兵滿營接連失分後，隨着傷兵陸續康復已回復勇況，值得睇好可就此帶返終點。反觀曼聯與車路士兩隊各有本身問題，想要後來居上，難度相當大。
bocmylai：論未來，倫敦值得睇好。阿仙奴乃真藍籌，領導出色，雲格帶出外籍新人潛質，前途無可限量。
即場來料 堅料：熱刺贏3:0
藍鑽石：今日意甲最睇好森多利亞W；近期兩連敗，但全屬作客；拿玻里無細簡，作客亦差；至於帕爾馬作客卡利亞里平手超高水，帕馬頂得住，可試。（結果：森多利亞2:0拿玻里）
吾中：向英超埋手。打比郡對熱刺陣容，熱刺前鋒貝碧托雖然只列後備，相信熱刺都夠贏。（結果：打比郡0:3熱刺）
賴恩：我個人都好認同吾中所講，如果熱刺踢得番上次對曼聯嗰場咁醒，相信打比郡都幾惡搞……不過推介都係入球「大」，而且熱刺呢排防守好似好番唔少，鍾意玩波膽嘅朋友，我推介熱刺淨勝2:0同3:0，再補個4:1！信唔信由你！（結果：打比郡0:3熱刺）
http://hk.myblog.yahoo.com/appleballmen/
有獎遊戲：呢位童星紅到爆
第一期的有獎問答遊戲終於到咗公佈答案時候，就係效力皇馬嘅羅賓奴，恭喜晒3位得獎者。至於今期嘅球星童年時又係邊個？畀少少貼士大家，近期係英超紅到爆嘅神射手，想攞獎品就快啲上網誌回應啦！
第1期答案：羅賓奴
得獎者：lorry、tsuntsunheha、bocmylai
本報將另行通知得獎者取獎品方法