調查結果話情人節想收花的女士只佔25%；據我觀察，想情人煮一頓美味餐的支持者應該更多。廚藝未到家？就請教Winnie啦！她從未正式學廚，但憑她對食材的鑽研和不斷試練，由她花心思教做的情人餐，連Barbie亦一學即曉，我們都應該做得到。
記者：廖秀娟
攝影：伍慶泉
示範：WinnieLeung@NobleRestaurant（28684388）
廚師WinnieLeung
是OysterExpress及Noble餐廳的老闆兼行政總廚，名人明星如林建岳、許晉亨、梁朝偉及劉嘉玲等經常捧場。
心形龍脷蛋糕
製作時間：15分鐘 2人份量
用龍脷做出甜品蛋糕賣相已經夠煞食，味道也全然不賴，龍脷鮮味又滑溜，睇得又食得，情人一定讚賞！
材料
龍脷柳2件、意大利番茄1罐、香草碎/檸檬汁/番荽各少許、蒜茸/洋葱碎各2茶匙、士多啤梨1粒、鹽/胡椒適量、廚酒/生粉各少許
做法
1.先將龍脷柳洗淨抹亁，加上檸檬汁，撒上鹽及胡椒粉，撲上生粉，直切成條狀。
2.沿住餅模將魚柳捲入去，填滿所有空間後，將整個模放入另一較大的心形模中，以大火蒸10分鐘。
3.起鑊炒香蒜茸同洋葱碎，加入罐裝番茄煮到軟身（約15分鐘），撒上少許香草及廚酒兜勻，倒上碟鋪平。
4.將魚柳脫模放喺醬汁中間，上面放上士多啤梨同番荽，就變成可愛嘅龍脷心形蛋糕㗎喇！
蟹膏煮豆腐
製作時間：10分鐘 2人份量
與上海的大閘蟹粉煮豆腐為一時瑜亮之作，法國膏蟹的煮法更容易為人接受，因為加了糖，醋味略減，更討人歡心。
材料
蟹膏1隻蟹份量、滑豆腐1磚、薑茸1湯匙、紹酒2湯匙、鎮江醋1湯匙、糖2茶匙、生粉水3湯匙、鹽/胡椒適量、葱花少許
做法
1.蟹洗淨拆肉起膏，蟹肉留起煮另一道菜。
2.以薑茸起鑊，中火炒香蟹膏，灒酒後加鎮江醋及糖兜勻，加鹽及胡椒調味。
3.加入豆腐輕手兜勻，煮5分鐘，以生粉水埋芡便可上碟，最後撒上葱花便成。
貼士
上海式煮蟹粉法，醋味太濃，Winnie的配方是加適量糖，更加吊出蟹粉鮮味。
讀者問：拆蟹係咪買把貴廚剪，例如孖人牌就得㗎喇？
答：其實唔使㗎！用我哋國寶大閘蟹剪就得㗎喇，剪硬殼膏蟹仲啱。
忌廉法國膏蟹湯
製作時間：20分鐘 2人份量
蟹湯香滑得緊要，蟹肉的鮮味更加提升了忌廉湯的層次，感覺很矜貴啊！
材料
蟹肉1隻份量、麵粉3湯匙、無鹽牛油3湯匙、蒜茸2湯匙、洋葱半個（切粒）、魚湯1至1.5杯、鮮奶400毫升、亁葱2湯匙、鹽/胡椒適量、番荽少許
做法
1.用湯煲以中細火煮溶牛油，逐少加入麵粉慢炒，至兩者炒至融合，逐少加入魚湯，煮至濃忌廉湯狀。
2.另一平底鑊以少許油炒香蒜茸、洋葱粒及亁葱粒至軟身，加入剛才的忌廉湯、蟹肉及番荽碎，加適量的鹽及胡椒調味，最後加入鮮奶拌勻便可享用。
余小姐問：點炒蟹膏唔黐底？
答：蟹膏炒時要細火慢慢炒，一邊加醋加糖就會又香，味道又夾㗎嘞！
生蠔蒸水蛋
製作時間：15分鐘 2人份量
蒸水蛋裏面可以隨意加料，今次加新鮮美國蠔，感覺上等又精緻。蠔與蛋一向匹配，不用擔心兩者夾不來。
材料
美國生蠔或桶蠔2隻（洗淨切大粒）、雞蛋3隻、水4.5隻蛋份量、油少許、鹽/胡椒適量、葱花/番荽各少許
做法
1.雞蛋與水混合拂勻，加鹽及胡椒調味，再加少許油令其滑身。
2.加入蠔肉粒，輕輕攪勻，以中大火蒸10分鐘，撒上葱花及番荽裝飾便成。
貼士
如果用新鮮生蠔，記得冲水去殼碎的程序，不然容易咬崩牙。
Mandy問：用新鮮生蠔同桶蠔蒸水蛋有咩唔同？會唔會腥㗎？
答：新鮮生蠔反而唔會腥，桶蠔都一樣好。