噚日港股升番啲，但港交所（388）唔跟大勢，逆市跌個八，收報158.5蚊。網友raindropwong7喺《香港討論區》呼籲：「388已好近政府入市價，大家快追入啦。」港府上年9月7日增持港交所，次日港交所股價最高見158.7蚊，收報158。
oichu78好聽話，下晝收市前即刻買，但冇講邊個價位入。之不過，唔係個個都咁聽話，不飛達高呼：「等到100蚊先入。」MUFC就話：「要跌破政府入市價先買。」30313233仲踩多腳，好心凉咁話：「等政府知道坐艇滋味。」但cckchu822質疑：「政府會唔會已經高位放咗？」
等120蚊至出手
網友曾軟倉出動方程式，計出120蚊先係合理價，即係叫大家再等吓。JUSTSAYHALLO附和：「120蚊就會入第一手。」但都有人唱反調，NO.47就覺得「入唔過」，理由係「成交好少。」以馬論馬搭嘴：「成交咁少，唔跌有鬼。」馬後砲台贊成話：「近3日每日總成交都少過860億銀，港交所邊值160蚊。」