李小姐：今日電訊盈科（008）宣佈私有化盈大地產（432），我留意緊電盈，消息對佢係咪有利？
郭家耀：私有化後加埋現有股權，盈大地產對電盈每股盈利貢獻唔多，𠵱家電盈嘅提價較資產淨值有折讓，加埋之後貝沙灣嘅入賬，李澤楷都係睇到有着數先私有化。
楊慧玲：電盈好多Deal都爛尾收場，梁伯韜話收購電盈，股價曾升過一成，衰咗之後都跌返去收購前個位，短炒都要識落車。其實要買收購概念應該揀盈大。
郭：恒指檢討，電盈有機會被剔出藍籌，短期有一定壓力，盈大反而值得留意，因為可以博電盈提高私有化價格。
《屯門李小姐建議》
建議買入價：4.45元
目標價：5元
止蝕價：-
時期：兩星期
東亞銀行（023）
博有好業績
黃先生：今日推介就嚟公佈業績嘅東亞銀行（023），博佢哋內地嘅貸款業務同盈利增長，會比巿場預期好。
郭：巿場未估到次按債券投資撥備，𠵱個因素影響盈利表現。業績達唔達標對東亞後市影響較大，如果增長有兩成以上，股價會再上，不過長線嚟睇，對佢仍然有信心，但係要睇吓聽日業績公佈。
黃：我定咗40蚊止蝕。
楊：佢哋開拓內地業務比其他中小型銀行積極，巿場都睇緊佢哋內地業績會唔會創新高，但係如果次按撇賬大，長揸雖然無問題，短炒就唔係太好，聽日個巿好嘅話可以考慮先走一走。
《葵涌黃先生個案》
買入價：41元
目標價：48元
止蝕價：40元
時期：兩星期
中外運航運（368）
走勢好$5.2入貨
徐小姐：我推介中外運航運（368），原因係航運股近期走勢好轉，波羅的海指數又升咗，𠵱隻股上咗市唔係太耐，仲潛緊水，股價更一度由高位跌咗一半，近期企穩番。
楊：你買咗未？
徐：未，想喺5.2蚊入市。
郭：中外運航運上市後股價一直潛水，從運載力睇，唔及中海發展（1138）同埋中國遠洋（1919）咁好，但博航運股短期有反彈，我都唔反對，因為中外運航運始終喺低位有支持，但從中線前景嚟睇，未必有另外兩隻航運股咁好。大家都知，內地雪災後，中央加快運送物資到災區，同埋增加運煤能力。從股價睇，中國遠洋同中海發展嘅股價反彈能力係高過中外運航運，主要因為得到「重建」嘅定單較前兩者為少，短炒嘅話有機會博升10%，但長揸就唔係特別理想嘅選擇。
《西貢徐小姐建議》
建議買入價：5.2元
目標價：6.7元
止蝕價：4.8元
時期：一個月
中交建（1800）
有水位夠穩陣
關公：個市升得咁急，唔敢入市，穩陣啲想揀中交建（1800），我覺得佢仲有啲水位。佢有雪災重建股概念，又喺國內外都有基建項目，𠵱家股價喺20蚊左右，最高曾經去過25.4蚊，應該仲有幾蚊水位。
郭：相對唔少跌咗四、五成嘅資源股，中交建嘅抗跌力好強，一來本身基建概念受市場歡迎，二來中鐵建就嚟上市，中鐵建上市價都會參考中交建嘅估值，唔排除有啲人炒高有影子味道嘅中交建，令中鐵建定價可以高啲。事實上，中交建本身業績好，令到佢每次急跌後反彈力強。
楊：的而且確，佢喺20蚊好硬淨。
郭：從過去兩個月股價走勢嚟睇，中交建每逢低位都有買盤，喺20蚊有唔錯支持，關公定嘅18蚊止蝕位都唔錯，有機會喺一年內見24蚊。
《大埔關公建議》
建議買入價：20.5元
目標價：24元
止蝕價：18元
時期：一年
上置集團（1207）
坐艇唔諗止蝕
李先生：我始終對內房股有興趣，之前打嚟推介過碧桂園（2007），今日想講吓上置集團(1207)，我1月嗰時喺2蚊入咗，雖然坐咗艇，但睇番之前佢3蚊左右配過股，跌到現價水平，折讓好大，所以唔諗住止蝕。
郭：折讓係同資產淨值比較，並唔係同之前股價比較，而且買內房股要睇土儲。
李：佢有3100萬平方米土儲喎！
郭：上置嘅土儲主要集中喺上海同瀋陽，我較睇好土儲分散嘅內房股，好似中國海外（688）同華潤置地（1109）。政府雖然定時會拍賣土地，但二三線公司攞新地較難，論反彈始終大股會強啲，要長揸都係揀大型內房股。
楊：有間基金NewtonInvestment喺舊年11月開始減持上置，持股量由8.15%減到𠵱家唔夠5%，呢啲現象可以作為參考指標。
郭：如果佢無能力再買地，增長會無咁大。
《旺角李先生個案》
買入價：2元
目標價：3.5元
止蝕價：-
時期：半年