豬年尾聲時，疑似藝人淫照事件恍如炸彈爆發，成為本地娛樂圈史上數一數二的轟動新聞，被捲入淫照風波的鍾欣桐（阿嬌）、陳冠希前緋聞女友鄧麗欣（Stephy）及受太太張栢芝牽連的謝霆鋒全遭波及，不過堪輿學家蘇民峰卻向阿嬌大派定心丸，指08年旺「木」及「土」姓氏的藝人，阿嬌和方力申及蔡卓妍（阿Sa）和鄭中基這兩對緋聞男女，俱可創事業高峯。
蘇民峰說：「啲人有木有土特別有利，好似方力申、鍾欣桐，佢哋會有個人高峯運；蔡卓妍、鄭中基、陳法拉、舒淇、梁洛施、謝安琪佢哋都好，但每個人嘅高峯運同成就都唔同。」蘇民峰又預測9位藝人的鼠年運程，指Stephy豬年犯太歲，易遇不快事，今、明兩年是思想學習期，易有霧水桃花；霆鋒豬年是非多，但鼠年後感情穩定。
至於鼠年娛圈整體運勢，蘇民峰批偶像風減退，利食腦創作，他說：「07、08、09呢3年屬水，係經濟活躍期，娛樂圈同經濟息息相關，娛樂圈基本上唔錯，越嚟越流行諗計度橋同埋創作歌手，04年後嘅紅人多數識得創作，偶像冇咁流行，對男藝人有利啲。拍電視冇咁着數，因為利謀略戲，師奶唔識睇，電視會係知識性年代，好似discovery呢啲資訊性節目會更受歡迎。」撰文：朱倬誼
鄧麗欣觀眾緣轉好
08同09係思想學習年，上年犯太歲，易遇唔開心事，鼠年觀眾緣好啲，但有霧水桃花，感情易有，易同已識嘅人一齊，但又冇結果，2012同2013會比較好。
謝霆鋒整體運平順
屬猴犯太歲，豬年是非特別多，嚟緊呢年平穩，不過不失，冇乜大轉變，感情冇乜起伏。
劉德華迎接攞獎年
大運46至51歲，仲有5年高峯運，尤其2012同2013呢兩年最好、最高峯，仲有突破。劉德華鼠年感情穩定，地位提升，係易攞獎年。
張敬軒人氣續攀升
07同08年名氣地位提升，2010、2011高峯，09年會較平淡，唔係突破，但唔係特別衰，佢喺豬年是非比較多，鼠年桃花唔會特別多，係普通年。
周星馳鼠年驛馬動
07、08、09年唔錯，平穩好運，但唔係突破嘅好運，08、09年有名氣運、貴人運，感情唔覺有乜特別，鼠年係佢驛馬年，走動較多。
楊千嬅真姻緣未到
平穩運，未有突破，感情穩定，人緣好，2010、2011最大機會有真姻緣，快極都2009，佢今年犯太歲，感情易有變化，結婚同分手都係變化。
梁朝偉夫妻宮相合
06、07年個人高峯運，會有大突破，08、09年慢落嚟，感情穩定，夫妻宮相合年，冇乜問題。
應采兒尋愛情突破
屬豬，07年犯太歲，代表思想混亂，感情唔穩定，周圍轉，過咗新曆5月6號豬年嘅氣結束，佢易有高峯，會有突破。
邵逸夫健康運護身
34歲入大運，行60年，直到94歲，但大運完咗唔代表衰，輪到收成期，之前嘅60年佢事業發展快，𠵱家係等回報，07、08年有利佢身體，會幾健康。
